Myanmar
English◼KNU တပ်မဟာ (၅) နယ်မြေ မဲဝိုင်ကျေးရွာ အုပ်စု နဲ့ ကျုံဒိုးမြို့နယ်တို့ကို စစ်အုပ်စုက လေကြောင်းနဲ့ နှစ်ရက်ဆက်တိုက် ဗုံးကြဲတိုက်ခိုက်ခဲ့တယ်လို့သိရပါတယ်။
ဒါ့အပြင် လက်နက်ကြီးတွေနဲ့ပါ ပစ်ခတ်တိုက်ခိုက်ခဲ့တဲ့အတွက် ဒေသခံများနေအိမ် (၁၉) လုံးပျက်စီးခဲ့ရပါတယ်။
ကရင်အမျိုးသားအစည်းရုံး တပ်မဟာ (၅)က ဒီနေ့ ဒီဇင်ဘာ (၂၀) ရက်မှာသတင်းထုတ်ပြန်လိုက်တာပါ။
ဒီဇင်ဘာ (၁၉) ရက် မနက် ၈ နာရီခန့်က မူတြော်ခရိုင် ဒွယ်လိုးမြို့နယ် မဲဝိုင်ကျေးရွာအုပ်စု ခေါဝါးရွာ ရဲ့ လယ်ယာလုပ်ငန်းခွင်ထဲကို စစ်ကောင်စီက တိုက်လေယာဉ်နဲ့ ဗုံးကြဲခဲ့ပါတယ်။
အဲဒီနောက် မနက် ၁၀ နာရီ ခွဲ အချိန်လောက်မှာ ထပ်မံပြီး ဗုံး နှစ်လုံး ကြဲချခဲ့ပါသေးတယ်။
ဒီဇင်ဘာ (၁၈) ရက် ညနေပိုင်းက မဲဝိုင်ကျေးရွာအုပ်စု ဝါးသိုးလော်ရွာထဲကို တိုက်လေယာဉ်နဲ့ ဗုံးတွေကြဲချခဲ့တဲ့အတွက် လူနေအိမ် (၁၀)လုံး မီးလောင်ပျက်စီးဆုံးရှုံးခဲ့ရပြီး စပါးကျီများလည်း ဗုံးမှန်ပျက်စီးခဲ့ရပါတယ်။
အဲဒီနေ့ ညနေပိုင်းမှာပဲ မဲဝိုင်ကျေးရွာအုပ်စု ခလိုခီးရွာ ထဲကကို တိုက်လေယာဉ်နဲ့ဗုံးကျဲတိုက်ခိုက်ခဲ့တဲ့အတွက် လူနေအိမ် (၄)လုံး နဲ့ စပါးကြိတ်စက် တလုံးမီးလောင်ဆုံးရှုံးခဲ့ရပြန်ပါတယ်။
KNU တပ်မဟာ (၅) နယ်မြေ မဲဝိုင်ဒေသအတွင်းကို အခုလိုလေကြောင်းကနေ ၂ ရက်ဆက်တိုက်ဗုံးကြဲတိုက်ခိုက်လာတဲ့အတွက် ဒေသခံရွာသူရွာသားတွေဟာ နေအိမ်ပျက်စီးမှုတွေကြောင့် အခက်အခဲများနဲ့ ရင်ဆိုင်နေကြရတယ်လို့ ထုတ်ပြန်ထားတာပဲဖြစ်ပါတယ်။
