ဖရူဆိုနှင့် ရှားတောရှိ စစ်ကောင်စီစခန်းများကို ကရင်နီပူးပေါင်းတပ်ဖွဲ့များက ဝင်‌ရောက်တိုက်ခိုက်

◼အကြမ်းဖက်စစ်ကောင်စီဘက်မှ ထိခိုက်သေဆုံးမှုများရှိ

ကရင်နီ(ကယား)ပြည်နယ်၊ ဖရူဆိုနှင့် ရှားတော မြို့နယ်ရှိ အကြမ်းဖက်စစ်ကောင်စီ တပ်စခန်းများကို တော်လှန်ရေးတပ်ဖွဲ့များက ဖေဖော်ဝါရီ (၂၀)ရက် မနက် ၈ နာရီ အချိန်မှာ တိုက်ခိုက်ခဲ့ကြတာဖြစ်ပြီး အကြမ်းဖက်စစ်ကောင်စီဘက်က သေဆုံးထိခိုက်မှုတွေရှိတယ်လို့ ကရင်နီစစ်ဘက်ဆိုင်ရာ ဗဟို (KMIC) ရဲ့ သတင်းထုတ်ပြန်ထားချက်အရသိရပါတယ်။

ရှားတောမြို့အနီး က အကြမ်းဖက် စစ်ကောင်စီ ခမရ (၅၁၀)တပ် ရဲ့ မြို့တွင်းစခန်းကို ကရင်နီတပ်မတော်(KA) နဲ့ကရင်နီအမျိုးသားများကာကွယ်ရေးတပ် (KNDF) တို့ က ပူးပေါင်း တိုက်ခိုက်ခဲ့ကြတာဖြစ်ပါတယ်။

ဖရူဆိုအခြေစိုက် ခမရ (၅၃၁)တပ် ကိုလည်း ဖေဖေါ်ဝါရီ (၁၆) ရက်မှာ ကရင်နီတပ်မတော်က ဝင် ရောက်တိုက်ခိုက်ရာ စစ်ကောင်စီတပ်သားတဦး သေဆုံးခဲ့ပါတယ်။

အခုလိုတိုက်ပွဲတွေကြောင့် အကြမ်းဖက် စစ်ကောင်စီတပ်ဟာ ဖရူဆိုမြို့အရှေ့ခြမ်းတစ်လျှောက် ကင်းထောက် ရဟတ်ယာဥ်တွေနဲ့ ထောက်လှမ်းမှုတွေ ပြုလုပ်နေတယ်လို့ သိရပါတယ်။

ရှမ်း-ကရင်နီ နယ်စပ်တိုက်ပွဲမှာလည်း အကြမ်းဖက် စစ်ကောင်စီတပ်သား ငါးဦးဖမ်းဆီးရမိပြီး ခြောက်ဦးသေဆုံးခဲ့ပြီး လက်နက်မျိုးစုံ(၁၀)လက်နှင့် ကျည်ဆံ၊ ခဲယမ်းများ ကို ဖေဖေါ်ဝါရီ (၁၉) ရက်မှာ ကရင်နီတပ်မတော် KAက သိမ်းဆည်းရမိခဲ့တယ်လို့ သိရပါတယ်။