အီးယူ-အာဆီယံ ထိပ်သီးအစည်းအဝေး ခေါင်းဆောင်များရဲ့ ပူးတွဲကြေညာချက်အပေါ် NUG က သဘောထားကြေညာချက် ထုတ်ပြန်

◼ အီးယူ-အာဆီယံ ထိပ်သီးအစည်းအဝေး ခေါင်းဆောင်များရဲ့ ပူးတွဲကြေညာချက်အပေါ် NUG က သဘောထားကြေညာချက် ကို ဒီကနေ့ ဒီဇင်ဘာ(၁၉)ရက်က ထုတ်ပြန်ကြေညာ လိုက်ပါတယ်။

အီးယူ-အာဆီယံ ထိပ်သီးအစည်းအဝေး ခေါင်းဆောင်များ၏ ပူးတွဲကြေညာချက်မှာ မြန်မာနိုင်ငံအတွင်း အကြမ်းဖက်မှုများ ချက်ချင်းရပ်တန့်ရန်၊ နိုင်ငံရေးအကျဉ်းသားများအားလုံးကို လွှတ်ပေးရန်နှင့် လိုအပ်လျက်ရှိသည့် လူသားချင်း စာနာမှုအကူအညီများအား ခွဲခြားဆက်ဆံမှုမရှိဘဲ ထိရောက်စွာပေးအပ်နိုင်ရေးတို့အတွက် တောင်းဆိုထားသည်ကိုတွေ့ရှိရတယ်လို့ NUG က ပြောပါတယ်။

ထုတ်ပြန်ချက်ထဲမှာ အီးယူ-အာဆီယံ ထုတ်ပြန်ချက်ထဲက အချို့ကို ကြိုဆိုပြီးအချို့သော အချက်အလက်များဟာ အသစ်အဆန်း မဟုတ်သကဲ့သို့ အရေးပါသည့် အချက်အလက်တွေ မပါဝင်ဘဲ ကျန်ရှိနေသည်ကို တွေ့ရှိ ရတယ်လို့ NUG က ထောက်ပြပြောကြားထားပါတယ်။

စစ်အုပ်စုကြောင့်ဖြစ်ပေါ်နေတဲ့ ဘက်ပေါင်းစုံအကျပ်အတည်းတွေကို အီးယူ-အာဆီယံ က ဆောင်ရွက်မယ့် နှစ်ဆတိုးကြိုးပမ်းအားထုတ်မှုနဲ့အတူ NUG အနေနဲ့ လည်းပူးပေါင်းဆောင်ရွက်သွားဖို့ အသင့်ရှိတယ်လို့ ထုတ်ပြန်ချက်မှာဖော်ပြထားပါတယ်။

အီးယူ-အာဆီယံ ပူးတွဲကြေညာချက်မှာတော့ အမျိုးသားညီညွတ်ရေးအစိုးရ (NUG) ကို တရားဝင်ကိုယ်စားလှယ်အဖြစ် ထောက်ခံကြောင်းဖော်ပြထားတာမရှိတဲ့အပြင် တရားမဝင် အကြမ်းဖက် စစ်အာဏာရှင်၏ ရက်စက်ယုတ်မာမှုများကို ရှုတ်ချကြောင်းကိုလည်း ဖော်ပြဖို့ပျက်ကွက်ခဲ့တယ်လို့ NUG က ထောက်ပြထုတ်ပြန်ထားပါတယ်။

အီးယူ-အာဆီယံ ထိပ်သီးဆွေးနွေးပွဲကာလအတွင်း အီးယူက NUG နိုင်ငံခြားရေးဝန်ကြီး အပါအဝင် ဝန်ကြီးအချို့ကို ဘယ်လ်ဂျီယံ၊ ဘရပ်စဲလ်သို့ ဖိတ်ကြားတွေ့ဆုံခဲ့ပြီး မြန်မာ့အရေးအတွက်ဆွေးနွေးမှုများပြုလုပ်ခဲ့တာဖြစ်ပါတယ်။

အာဆီယံ – အီးယူ ထိပ်သီးဆွေးနွေးပွဲမှာ အာဏာသိမ်းစစ်ခေါင်းဆောင် မင်းအောင်လှိုင်ကို ဖိတ်ကြားခြင်းမပြုခဲ့ပါဘူး။
လူ့အခွင့်အရေးနှင့် အခြေခံလွတ်လပ်ခွင့်များအတွက် ကတိကဝတ်ပြုထားသည့် အီးယူ-အာဆီယံ ကတိကဝတ်ပြုမှုဟာ ၂၀၂၀ပြည့်နှစ် အထွေထွေရွေးကောက်ပွဲရလဒ်ကိုသာ အတည်ပြု လက်ကိုင်ထားရမှာဖြစ်တယ်လို့ ထုတ်ပြန်ချက်မှာထည့်သွင်းဖော်ပြခဲ့တာပါ။

အကြမ်းဖက်စစ်အုပ်စု၏ အတုအယောင် ရွေးကောက်ပွဲကျင်းပရန် ကြိုးပမ်းမှုများ အားလုံးကို တားဆီးပိတ်ပင်ရမှာ ဖြစ်ပြီး မြန်မာပြည်သူများ၏ ဒီမိုကရေစီ ဆန္ဒအား လေးစားမှုကို ပြသရမှာဖြစ်တယ်လို့ NUG က တိုက်တွန်းထားတာဖြစ်ပါတယ်။

ဒါ့အပြင် ဖယ်ဒရယ်ဒီမိုကရေစီပဋိညာဉ်စာတမ်းကို ထောက်ခံရမည်ဖြစ်ပြီး အကြမ်းဖက် စစ်အုပ်စု၏ ဥပဒေမဲ့ အရေးအပြစ်မဲ့အရပ်သားများအပေါ် နောက်ထပ်ရက်စက်ကြမ်းကြုတ်မှုများ ပြုလုပ်လာနိုင်မည့် စစ်အုပ်စု၏ လုပ်ဆောင်နိုင်စွမ်းအား ဖြိုဖျက်နိုင်ရန်အတွက် ထိရောက်သည့်ဆောင်ရွက်မှုကို တောင်းဆိုရမှာဖြစ်တယ်လို့ ဖော်ပြပါရှိပါတယ်။

အကြမ်းဖက်စစ်အုပ်စုအနေဖြင့် နိုင်ငံရေးအကျဉ်းသားတွေကို ထပ်မံကွပ်မျက်ခြင်း မပြုလုပ်နိုင်ရန်အတွက် ပြင်းထန်တဲ့ ဖိအားတွေပေးရန် လိုအပ်တယ်လို့ NUGက ဒီကနေ့ထုတ်ပြန်ချက်ကနေ တိုက်တွန်းထားတာဖြစ်ပါတယ်။