ခမရ(၆၀၂)က တပ်ကြပ်ကြီးတစ်ဦး CDF-Daai ထံကိုအလင်းဝင်ရောက်

အကြမ်းဖက်စစ်ကောင်စီရဲ့ ခမရ(၆၀၂)က တပ်ကြပ်ကြီးတစ်ဦး CDF-Daai ထံကို ဒီဇင်ဘာ (၁၂)ရက် က အလင်းဝင်ရောက်လာတယ်လို့ ချင်းကာကွယ်ရေးတပ် – ဒိုင်ရ်(CDF-Daai)က ဒီနေ့ ဒီဇင်ဘာ (၁၉)ရက်မှာ သတင်းထုတ်ပြန်လိုက်ပါတယ်။

အကြမ်းဖက် အာဏာရှင် စစ်ခေါင်းဆောင်တွေလက်အောက်မှာ ဆက်လက်တာဝန်ထမ်းဆောင်လိုစိတ်မရှိတော့တဲ့အတွက် အခုလို အလင်းဝင်ပြီး CDM ပြုလုပ်လာခဲ့တာဖြစ်ပါတယ်။

CDF-ဒိုင်ရ် က နွေးထွေးစွာ ကြိုဆိုခဲ့ပြီး လွတ်မြောက်နယ်မြေ တနေရာသို့ ပို့ဆောင်ခဲ့ပြီးဖြစ်တယ်လို့ ထုတ်ပြန်ထားပါတယ်။
အခုအလင်းဝင်လာတဲ့ တပ်ကြပ်ကြီးစာရေး အပါအဝင် CDF – ဒိုင်ရ် ဆီကို လာရောက် အလင်းဝင်လာကြတဲ့ စစ်ကောင်စီတပ်သား စုစုပေါင်း ( ၅)ဦးရှိပြီဖြစ်ပါတယ်။

အကြမ်းဖက်စစ်ကောင်စီ လက်အောက်မှာ တာဝန်ထမ်းဆောင်လိုခြင်းမရှိလို့ ပြည်သူ့ရင်ခွင် ခိုလှုံလိုသူ ပြည်သူ့တပ်မတော် သားများကိုလည်း CDF – ဒိုင်ရ်က နွေးထွေးစွာ ကြိုဆိုလက်ခံသွားမှာ ဖြစ်တယ်လို့ လည်း အသိပေးထားပါတယ်။

CDF- ဒိုင်ရ်ဟာ ပလက်၀ မြို့နယ်မှာ အခြေချလှုပ်ရှားတဲ့ ချင်းလက်နက်ကိုင်တပ်တခုဖြစ်ပါတယ်။ မင်းတပ်၊ မတူပီ၊ ကန်ပက်လက် မြို့နယ်များမှာလည်း စစ်အာဏာရှင်ကို ဆန့်ကျင် တိုက်ပွဲဝင်လျက်ရှိနေတာဖြစ်ပါတယ်။

မကြာသေးမီကလည်း တီးတိန်အခြေစိုက် စစ်ကောင်စီတပ် ခလရ(၂၆၉) တပ်ရင်းမှ တပ်သား ၃ဦး၊ ဟားခါးအခြေစိုက် စစ်ကောင်စီတပ် ခလရ (၂၆၆)မှ တပ်သား ၆ဦး၊ ဟားခါးရဲစခန်းက ရဲတစ်ဦး၊ မင်းတပ် အခြေစိုက် ခလရ(၂၇၄)မှ တပ်သားတစ်ဦးတို့ဟာ လက်နက်ခဲယမ်းတွေနဲ့အတူ သက်ဆိုင်ရာဒေသက CDF တပ်ဖွဲ့များထံ အလင်းဝင်ခဲ့ကြပါသေးတယ်။