အကြမ်းဖက် စစ်ကောင်စီကြောင့် မီးဘေးသင့် ရတဲ့ စစ်ဘေးရှောင်တွေကို ပြည်သူ့ကာကွယ်ရေးတပ်ဖွဲ့တွေက စောင်နဲ့ အဝတ်အထည်တွေ လှူဒါန်း

◼စစ်အုပ်စုမီးရှို့လို့ ဒုက္ခရောက်နေချိန် မှာ အခုလို လာရောက်လှူဒါန်းတဲ့အတွက် PDF တွေကို ဒေသခံတွေက အထူးကျေးဇူးတင်ရှိကြောင်းပြောကြား ခဲ့

ဒီပဲယင်းမြို့နယ် အရှေ့ခြမ်းက အကြမ်းဖက် စစ်ကောင်စီကြောင့် မီးဘေးသင့် ရပြီး စစ်ဘေးရှောင်နေရတဲ့ ပြည်သူတွေကို SNAKE EYES – PDF အဖွဲ့က အဝတ်အထည်နဲ့ စောင်တွေ သွားရောက်လှူဒါန်းခဲ့ကြတယ်လို့ သိရပါတယ်။

ဒီဇင်ဘာ (၁၉) ရက် က မီးဘေးသင့်ရွာ သုံးရွာ တို့အတွက် ပေးအပ်လှူဒါန်းခဲ့ကြတာပါ။ ပြည်တွင်းပြည်ပ အလှူရှင်တွေက လှူဒါန်းထည့်ဝင်ခဲ့တာတွေကိုSNAKE EYES – PDF အဖွဲ့ က ပြန်လည်မျှဝေလှူဒါန်းပေးခဲ့ကြတာပါ။

ခုလို ဆောင်းကာလအချိန်မှာ စစ်အုပ်စု က မီးရှို့လို့ နေစရာမရှိအကာကွယ်မဲ့နေကြရတဲ့အချိန်မှာ စောင်နဲ့ အဝတ်အထည်တွေလာရောက်လှူဒါန်းပေးကြတဲ့အတွက် ပြည်သူ့ကာကွယ်ရေးတပ်ဖွဲ့တွေကို အထူးကျေးဇူးတင်တယ်လို့ ဒေသခံတွေကပြောပါတယ်။

ပြည်သူ့ ခုခံတော်လှန်စစ်အင်အားကောင်းတဲ့ စစ်ကိုင်းတိုင်းဒေသကြီးအတွင်းမှာ အကြမ်းဖက်စစ်ကောင်စီက စစ်ကြောင်းအမျိူးမျိုးနဲ့ ရွာတွေကိုဝင်ရောက်ဖျက်စီးနေတာလည်းဖြစ်ပါတယ်။

လတ်တလောရရှိထားတဲ့စာရင်းတွေအရ အိမ်ခြေပေါင်း ၂၇,၄၉၆ ကျော်ဟာ အကြမ်းဖက် စစ်အုပ်စုရဲ့ မီးရှို့ဖျက်ဆီးခြင်းတွေကို ခံထားရတာဖြစ်ပါတယ်။