ဖရဲသီးများကို ချီးမြှင့်ငွေ၊ အကာအကွယ်၊ ခံစားခွင့်များနှင့်အတူ ပူးပေါင်းဖို့ NUG က ဖိတ်ခေါ်

NUG ကာကွယ်ရေးဝန်ကြီးဌာနက အကြောင်းအမျိုးမျိုးကြောင့် ပြည်သူ့ရင်ခွင် မခိုလှုံနိုင်သည့် အရာရှိ-စစ်သည်များ၊ ရဲတပ်ဖွဲ့ဝင်များ၊ ဌာနဆိုင်ရာဝန်ထမ်းများကို အမာခံသတင်းပေးပို့သူ(ဖရဲသီး)များအဖြစ် တော်လှန်ရေးအတွက် ပူးပေါင်း ပါဝင်ရန် ဖိတ်ခေါ်သည့် ကြေညာချက်တစောင်ကို ဒီဇင်ဘာ(၂၀)ရက်က ထုတ်ပြန်ခဲ့သည်။

အမာခံသတင်းပေးပို့သူ(ဖရဲသီး)အဖြစ် ပြုလုပ်မည်ဆိုပါက ကာကွယ်ရေးဝန်ကြီးဌာနသို့ ဆက်သွယ်၍ အချက်အလက်များ ဖြည့်သွင်းခြင်းကို ဦးစွာလုပ်ဆောင်ရမည်ဖြစ်ပြီး အချက်အလက်လုံခြုံမှု ရှိစေရန် အပြည့်အဝ တာဝန်ယူ အာမခံကြောင်းနှင့် သတင်း အချက်အလက် အဆင့်အတန်း အပေါ်မူတည်၍ ချီးမြှင့်ငွေများကိုလည်း ရရှိခံစားနိုင်မည် ဖြစ်ကြောင်း ဖော်ပြထားသည်။

ထို့ပြင် ပြည်သူ့အမာခံ သတင်းပေးပို့သူ (ဖရဲသီး)များသည် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၏ အကာအကွယ်ပေးမှု အာမခံချက်ကို တော်လှန်ရေးကာလ အတွင်း၌လည်းကောင်း၊ တော်လှန်ရေးအလွန်ကာလ၌လည်းကောင်း ပြည့်ဝစွာ ခံစားရမည် ဖြစ်ပြီး ပြည်သူ့ရင်ခွင် ခိုလှုံရေးအစီအစဉ်၏ အကျိုးခံစားခွင့်များကိုလည်း ရရှိခံစားရမည်ဖြစ်သဖြင့် ဖရဲသီးပြုလုပ်လိုသူများအနေနှင့် ဆက်သွယ်နိုင်သည့် တယ်လီဂရမ်နှင့် ဖေ့ဘုတ်စာမျက်နှာ လိပ်စာများကိုပါ ကြေညာချက်အရ အောက်ပါအတိုင်းသိရပါသည်။
ဆက်သွယ်ရန် –
Telegram – http://t.me/MyanmarPeople
Facebook – https://www.facebook.com/PeoplesEmbrace