KIA ဌာနချုပ်နယ်မြေ ကို စစ်ကောင်စီတပ် လေကြောင်း လက်နက်ကြီးများဖြင့် ပစ်ခတ်တိုက်ခိုက်

◼ လက်နက်ကြီးများ ကျေးရွာများ အနီးကျရောက်နေ၍ ဒေသခံများစိုးရိမ်နေရ

စစ်ကောင်စီ တပ်က ကချင်လွတ်လပ်ရေးတပ်မတော်(KIA)ဌာနချုပ် နယ်မြေကို ယခုရက်ပိုင်းအတွင်းမှာ လေကြောင်းကနေ ဗုံးကြဲတိုက်ခိုက်တာတွေကို ခပ် စိတ်စိတ် လုပ်ဆောင်နေပြီး လက်နက်ကြီးတွေနဲ့ ပစ်ခတ်တိုက်ခိုက်မှုတွေကိုလည်း ဆက်တိုက်လုပ်ဆောင်နေတယ်လို့ KIA သတင်းနှင့် ပြန်ကြားရေးဌာနက ထုတ်ပြန်အသိပေးထားပါတယ်။

အကြမ်းဖက် စစ်ကောင်စီတပ်က လက်နက်ကြီး ၊ လေကြောင်း တို့ဖြင့် ပစ်ခတ်တိုက်ခိုက်မှုတွေပြုလုပ်နေတဲ့အတွက် အရပ်သားများရှိရာ ကျေးရွာအနီး ကျရောက်ပေါက်ကွဲမှုတွေရှိနေတဲ့အတွက် ဒေသခံများ စိုးရိမ်နေကြရကြောင်း KIA သတင်းပြန်ကြား ရေးဌာနက အသိပေးထုတ်ပြန်ထားတာပါ။

ထုတ်ပြန်ချက်မှာ ဒီဇင်ဘာ (၁၇) ရက်မှ (၂၀) ရက်အတွင်း အကြမ်းဖက်စစ်ကောင်စီတပ်က လေကြောင်းမှ ဗုံးကြဲခြင်း ၊ လက်နက်ကြီး နဲ့ ပစ်ခတ်ခြင်းစတဲ့ အခြေအနေတွေကို ထုတ်ပြန်ခဲ့ခြင်းဖြစ်ပါတယ်။

ဒီဇင်ဘာ ၂၀ရက် တွင် မန္တလေးမြို့ တံတားဦး လေတပ်စခန်းမှ ဂျက်တိုက်လေယာဉ် နှစ်စီးဖြင့် KIA ဌာနချုပ်နယ်မြေရှိ ကျေးရွာ အနီးကို လာရောက် ဗုံးကြဲတိုက်ခိုက်ခဲ့တယ်လို့ ဖော်ပြပါရှိပါတယ်။

ဒီဇင်ဘာ ၁၉ရက်တွင်လည်း ခါရာဘွမ် နှင့် ဘွမ်ရယ်ဘွမ်တွင်တပ်စွဲနေရာယူထားသည့် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ရမ်းသမ်းပစ်ခတ်ခဲ့၍ မုန်လိုင်ခတ်ကျေးရွာအနီး ကျရောက်ပေါက်ကွဲခဲ့ပါတယ်။

ဒါ့အပြင် ဒီဇင်ဘာ (၁၇) ရက် မနက် ၁နာရီခန့် က ဂျက်တိုက်လေယာဉ် နှစ်စီးနဲ့ KIA ဌာနချုပ် နယ်မြေကို ဗုံးကြဲတိုက်ခိုက်ခဲ့တယ်လို့ ဖော်ပြထားပါတယ် အဲဒီတိုက်ခိုက်မှုမှာ လူထိခိုက်မှု မရှိခဲ့ပါဘူး။