စစ်အုပ်စုက ကန့်ဘလူနယ်ရှိ ဒေသခံငါးဦးကို လူသားဒိုင်းအဖြစ်ဖမ်းဆီး ၊ သုံးဦးကို သတ်ဖြတ်ကာ ရွာကိုမီးတင်ရှို့ခဲ့

◼ဖမ်းဆီးခံ အမျိုးသမီး နှစ်ဦးပျောက်ဆုံးလျက်ရှိ

စစ်အုပ်စု၏ ခြေမြန်တပ်ရင်း ခမရ (၃၆၈) နဲ့ ပျူ အဖွဲ့တွေဟာ ဒီဇင်ဘာ (၁၇) ရက်က ကန့်ဘလူ နယ်ထဲကဂါးဂလော် ရွာကို လက်နက်ကြီးတွေနဲ့ ပစ်ခတ်ဝင်ရောက်ပြီး ဘုန်းကြီးကျောင်းနဲ့ ကျေးလက်ဆေးပေးခန်းတွေကို မီးရှို့ဖျက်ဆီးခဲ့တယ်လို့ ကျွန်းလှ-ကန့်ဘလူ တက်ကြွလှုပ်ရှားသူများ အဖွဲ့က ဒီနေ့ ဒီဇင်ဘာ (၂၃) ရက်မှာ ထုတ်ပြန်လိုက်ပါတယ်။

စစ်ကိုင်းတိုင်း ကန့်ဘလူမြို့နယ် ဂါးဂလော်ကျေးရွာသို့ ဝင်ရောက်အကြမ်းဖက်မီးရှို့ခဲ့သည့် စစ်ကောင်စီတပ်သည် ဒေသခံပြည်သူ အမျိုးသားသုံးဦးနှင့် အမျိုးသမီးနှစ်ဦးအား လူသားဒိုင်းအဖြစ် ဖမ်းဆီးသွားပြီး ယင်းအနက် သုံးဦးကို သတ်ဖြတ်သွားခဲ့ပါတယ်။

အင်အား ရာကျော်ပါဝင်တဲ့ အကြမ်းဖက် စစ်ကောင်စီတပ်ဟာ ဂါးဂလော်ရွာကို မီးတင်ရှို့ခဲ့တဲ့အတွက် ဒေသခံပြည်သူ တွေရဲ့ နေအိမ် ၂၃ လုံး မီးလောင်ကျွမ်းပျက်စီးခဲ့ရပါတယ်။

စစ်အုပ်စု ဖမ်းဆီးသွားတဲ့အထဲက အမျိုးသားတဦးကို နှိပ်စက်ခံထားရတဲ့ ဒဏ်ရာတွေနဲ့ အတူ သေဆုံးနေတာကိုတွေ့ရှိရပြီး ကျန်အမျိုးသားနှစ်ဦးကိုတော့ မီးရှို့သတ်ဖြတ်ထားတယ်လို့ယူဆရတဲ့ မီးလောင်ပြာကျ ထားတဲ့ အရိုးစုနှစ်ခုအဖြစ်သာ တွေ့ရှိခဲ့ရတယ်လို့ အသိပေး ထုတ်ပြန်ထားတာပါ။

ဖမ်းဆီးခံထားရသည့် အမျိုးသမီးနှစ်ဦးကိုမူ ယခုအချိန်အထိပြန်လည်မတွေ့ရသေးပါဘူး။

ခြေမြန်တပ်ရင်း ခမရ (၃၆၈) နဲ့ ပျူ အဖွဲ့တွေဟာ လွှဲဆိပ်၊ လက်ခုပ်ကုန်းနှင့် ဘောရွာတို့ အကြမ်းဖက်ဝင်ရောက် မီးရှို့ဖျက်ဆီးမှုများကျူးလွန်ခဲ့တဲ့ စစ်ကြောင်း ဖြစ်တယ်လို့ ထုတ်ပြန်အသိပေးထားပါတယ်။