စစ်အာဏာသိမ်းပြီးနောက် ကြပ်တည်းမှုကြောင့် တလလျှင် ပြည်သူလေးသောင်းခန့် ပြည်ပသို့ထွက်ခွာနေရ

စစ်အာဏာသိမ်းတဲ့အချိန်ကစတင်ပြီး ပြည်တွင်းမှာ လူထုဟာ အကြပ်အတည်းပေါင်းစုံနဲ့ ရင်ဆိုင်နေကြရတာဖြစ်ပြီး နိုင်ငံရပ်ခြားကို တလကို လူ လေးသောင်းလောက် အထိ ထွက်ခွာနေကြတယ်လို့ International Organization for Migration (IOM) က ဒီဇင်ဘာ (၂၈) ရက်က ထုတ်ပြန်တဲ့အစီရင်ခံစာမှာဖော်ပြထားတယ်လို့သိရပါတယ်။

အဲဒီလို မဆင်မခြင် အာဏာသိမ်းမှုကြောင့် နောက်ဆက်တွဲဆိုးကျိုးတွေဖြစ်တဲ့ နိုင်ငံအတွင်းလုံခြုံမှု မရှိတော့ခြင်း ၊ တိုင်းပြည် စီးပွားရေးကျဆင်းလာခြင်း ၊ ပြည်ပရင်းနှီးမြှုပ်နှံမှုတွေ စွန့်ခွာလာခြင်း ၊အလုပ်အကိုင်အခွင့်အလမ်းများရှားပါလားကာ အလုပ်လက်မဲ့ဦးရေတိုးလားခြင်း နဲ့ အသက်မွေးဝမ်းကျောင်းမှု ဆိုင်ရာ လုပ်ငန်းတွေ ပပျောက်လာခြင်း တွေဖြစ်ပေါ်လာရတာဖြစ်တယ်လို့ အစီရင်ခံစာ ရေးသားတင်ပြထားပါတယ်။

အဲဒီ အစီရင်ခံစာမှာ ကိုဗစ် ကြောင့် စီးပွားရေးကျဆင်းတာတွေ ၊ အကြမ်းဖက် စစ်တပ်က အာဏာသိမ်းတဲ့အတွက် နိုင်ငံရေး မတည်ငြိမ်မှုတွေဖြစ်ပေါ်ပြီးတော့ နေရပ်စွန့်ခွာ ထွက်ပြေးရသူတွေ ၊ စစ်ဘေးရှောင်တွေ အဖြစ် ပြေးနေရသူတွေ ၊ ပြည်ပ နိုင်ငံတွေမှာ ခိုလှုံနေရသူတွေ စတဲ့ အရေအတွက်တွေဟာ တလကို လေးသောင်းလောက် အထိ ရှိနေတာဖြစ်တယ်လို့ ဖော်ပြထားတာပါ။

အခုလို ဖြစ်ရပ်တွေဟာ လူကုန်ကူးမှုကို တွန်းအားပေးရာရောက်ပြီး အကြမ်းဖက်စစ်ကောင်စီက လူသားချင်းစာနာမှု အဖွဲ့တွေ အပေါ်မှာလည်းပိုမိုတင်းကျပ်လာနိုင်တယ်လို့ IOM အစီရင်ခံစာမှာဖော်ပြထားပါတယ်။