အကြမ်းဖက်စစ်ကောင်စီရဲ့ တရားရုံးအသီးသီးက အမိန့်တွေဟာ မူလကပင် ပျက်ပြယ်ကြောင်း NUG အစိုးရထုတ်ပြန်

◼အားလုံးအတွက် တရားမျှတမှုကို ပြန်လည်ရရှိအောင်နဲ့  ပြစ်ဒဏ်ခံရထိုက်သူများ ပြစ်ဒဏ်ခံရခြင်းဘေးက ကင်းလွတ်နေတဲ့ အလေ့အထ(Impunity)ကို အဆုံးသတ်စေမည်ဟု ကတိပြု

နိုင်ငံတော်သမ္မတဦးဝင်းမြင့်နဲ့ နိုင်ငံတော်ရဲ့ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ကို အကြမ်းဖက်စစ်ကောင်စီက ထောင်ဒဏ်အသီးသီး ထပ်မံချမှတ်ခဲ့တာနဲ့ပတ်သက်ပြီး NUG အစိုးရက ကြေညာချက်ထုတ်ပြန်လိုက်ပါတယ်။

အကြမ်းဖက်စစ်ကောင်စီက မတရားထောင်ဒဏ်ချမှတ်တဲ့အပေါ်  NUG အစိုးရက ဒီဇင်ဘာ (၃၁) ရက်မှာ ကြေညာချက် ထုတ်ပြန်လိုက်တာပါ။

နိုင်ငံရေးတက်ကြွ လှုပ်ရှားသူများ အပါအဝင် အပြစ်မဲ့တိုင်းရင်းသားပြည်သူများအပေါ် ချမှတ်တဲ့ တရားရုံးအသီးသီးရဲ့ အမိန့်တွေက မူလကပင် ပျက်ပြယ်ကြောင်း ၂၀၂၁ ခုနှစ် ဒီဇင်ဘာလ (၉) ရက်စွဲနဲ့ ကြေညာချက်အမှတ် (၁၃/၂၀၂၁) ကို ထုတ်ပြန်ခဲ့ပြီးဖြစ်တယ်လို့ အသိပေးထားပါတယ်။

NUG အစိုးရအနေနဲ့ နိုင်ငံတော်သမ္မတ၊ နိုင်ငံတော်ရဲ့ အတိုင်ပင်ခံပုဂ္ဂိုလ်နဲ့  အကြမ်းဖက် စစ်ကောင်စီရဲ့ မတရားဖမ်းဆီးချုပ်နှောင်ခံရသူတွေ မတရားအမှုဆင် ပြစ်ဒဏ်ချမှတ်ခံရသူတွေ  သတ်ဖြတ်ခံသူတွေ နဲ့ အိုးအိမ်စည်းစိမ် ဖျက်ဆီးခံရသူများ အားလုံးအတွက် တရားမျှတမှုကို ပြန်လည်ရရှိအောင်နဲ့  ပြစ်ဒဏ်ခံရထိုက်သူများ ပြစ်ဒဏ်ခံရခြင်းဘေးက ကင်းလွတ်နေတဲ့ အလေ့အထ(Impunity) ကို နောင်တွင်မဖြစ်ပေါ်အောင် အဆုံးသတ်စေရေး တို့ကို မမေ့မလျော့နှလုံးသွင်းပြီး တော်လှန်ရေးအောင်မြင်ပြီးမြောက်တဲ့အထိ တစိုက်မတ်မတ် ဆက်လက်တိုက်ပွဲဝင်သွားမှာ ဖြစ်တယ်လို့ ကြေညာချက်မှာ ထုတ်ပြန်ဖော်ပြ ထားပါတယ်။