ပြည်သူလူထုရဲ့ အဆက်မပြတ်ထောက်ပံ့လှုဒါန်းမှုကြောင့် မျှော်လင့်တာထက် သာလွန်တဲ့ ရန်ပုံငွေ ပမာဏတစ်ခုကို ရရှိထားပြီး လက်နက်အင်အားကို အဆက်မပြတ် ဖြည့်ဆည်းလျက်ရှိဟုဆို

တော်လှန်ရေးမှာ အကြမ်းဖက်စစ်ကောင်စီကို ချေမှူန်းအနိုင်ယူနိုင်တဲ့ လုံလောက်တဲ့အင်အားရှိပြီး ဖြစ်လို့ ၂၀၂၃ ခုနှစ်ဟာ တော်လှန်ရေးအဆုံးအဖြတ်ရယူရမယ့်နှစ်ဖြစ်တယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က ဇန်နဝါရီ(၁)ရက် နှစ်သစ်ကူးမိန့်ခွန်းမှာ ပြောကြားလိုက်ပါတယ်။

ရန်ပုံငွေအင်အား အနေနဲ့လည်း ပြည်သူလူထုရဲ့ အဆက်မပြတ်ထောက်ပံ့လှုဒါန်းမှုကြောင့် မျှော်လင့်တာထက် သာလွန်တဲ့ ရန်ပုံငွေ ပမာဏတစ်ခုကို ရရှိထားပြီး ဖြစ်တဲ့အတွက် အမျိုးသားညီညွတ်ရေးအစိုးရအနေနဲ့ PDF တပ်ရင်းတိုင်းကို လက်နက်တပ်ဆင်ပေးနိုင်ဖို့ ပကဖတွေကိုလည်း ထိုက်သင့်တဲ့လက်နက် တိုးချဲ့တပ်ဆင်ပေးဖို့ အစဥ်တစိုက် စီစဥ်ဆောင်ရွက်နေတယ်လို့ ဆိုပါတယ်။

ဒီနှစ်အတွင်း တော်လှန်ရေးရဲ့ အဆုံးအဖြတ်ကို ရယူဖို့ အမျိုးသားညီညွတ်ရေးအစိုးရနဲ့ မဟာမိတ်များက One Year Plan ကို ရေးဆွဲအကောင်ထည်ဖော်လျက်ရှိပြီး ပြည်သူ့ တော်လှန်ရေးအတွင်း အသက်နဲ့ဘဝတွေကို စွန့်လွှတ်ထားခဲ့တဲ့ ပြည်သူ့ကာကွယ်ရေးတပ်ဖွဲ့ဝင်တွေရင်းနှီးပေးဆပ်မှုတွေအတွက် အမျိုးသားညီညွတ်ရေးအစိုးရကိုယ်စား ဂုဏ်ပြုဦးညွှတ်တယ်လို့လည်း ဝန်ကြီး ဦးရည်မွန် ကပြောကြားထားတာ တွေ့ရပါတယ်။