ချောင်းကြီးရွာရဲစခန်းကို ပြင်ဦးလွင်ခရိုင် PDF ပူးပေါင်းတပ်တွေ ဝင်စီးပြီး စစ်ကူကားတွေကိုပါ မိုင်းဆွဲတိုက်ခိုက်သဖြင့် စကစ (၆)ဦးခန့်သေဆုံး

မန္တလေးတိုင်း သပိတ်ကျင်းမြို့နယ် ချောင်းကြီးကျေးရွာနယ်မြေ ရဲစခန်းကို ပြင်ဦးလွင်ခရိုင်က ပြည်သူ့ကာကွယ်ရေးတပ်ဖွဲ့တွေက ဇန်နဝါရီ ၄ ရက်၊ ည ၈ နာရီ ၄၅ မိနစ်ခန့်က ပူးပေါင်းတိုက်ခိုက်ခဲ့ကြတယ်လို့ သိရပါတယ်။

ဗိုလ်လင်းယုန်တပ်ဖွဲ့(ပြင်ဦးလွင်ခရိုင် ပကဖ)၊ ဗိုလ်ကောင်းကင်တပ်ဖွဲ့(ပြင်ဦးလွင် ပကဖ)၊ စဥ့်ကူးမြို့နယ်(ပကဖ) နဲ့ Nine PDF တပ်ဖွဲ့တို့က ပူးပေါင်းတိုက်ခိုက်ခဲ့ကြတာပါ။

အကြမ်းဖက်စစ်ကောင်စီလက်အောက်ခံ ရဲ (၃)ဦး သေဆုံးခဲ့ပြီး စစ်ကူထွက်လာတဲ့ ဇရပ်ကွင်းကျေးရွာက စစ်ကောင်စီ တပ်ရဲ့ကား၂ စီးကို ဆင်မွှေးကျေးရွာနဲ့ လိပ်ကျကျေးရွာကြားမှာ ပဒေသာမိုင်း ၆ လုံးနဲ့ ဖောက်ခွဲတိုက်ခိုက်ခဲ့လို့ စစ်ကောင်စီတပ်သား ၅ ဦး ပြင်းထန်ဒဏ်ရာရပြီး စစ်ကူကားတွေလည်း ပြန်လှည့်သွားခဲ့ရတယ်လို့ ထုတ်ပြန်ထားပါတယ်။

ဒါ့အပြင် စဥ့်ကူးမြို့နယ်၊ ကျည်တောက်ပေါက်ကျေးရွာဘက်က အကြမ်းဖက်စစ်ကောင်စီရဲ့ စက်လက် သေနတ်တပ်ဆင်ပြီး မီးမှိတ်မောင်းလာတဲ့ကားတစီးကိုလည်း ချောင်းကြီးကျေးရွာ နယ်ခြားမှတ်တိုင်မှာ ပဒေသာမိုင်း ၆ လုံးနဲ့ ဆက်လက်ဖောက်ခွဲတိုက်ခိုက်ခဲ့ရာ စစ်ကောင်စီတပ်သား ၃ ဦး သေဆုံး‌ပြီး ၅ ဦးဒဏ်ရာရရှိခဲ့တယ်လို့ သိရပါတယ်။

အဲ့ဒီနောက် စဥ့်ကူးမြို့နယ်ပင်လယ်ကြီး စစ်ကောင်စီဂိတ်က ၆ ဘီးကား၂ စီးနဲ့ စစ်ကူထပ်ထွက်လာတာကြောင့် ပူးပေါင်းရဲဘော်တွေအားလုံး အထိခိုက်မရှိ အောင်မြင်စွာဖြင့် ပြန်လည် ဆုတ်ခွာခဲ့ကြတယ်လို့ သတင်းထုတ်ပြန်ထားတာ တွေ့ရပါတယ်။