အကြမ်းဖက်စစ်တပ်နဲ့ ပျူတွေက သီတဂူနာယက(၁၀)ပါး စာရင်းဝင် ဆရာတော်တပါးနဲ့ အမျိုးသမီးငယ်(၁)ဦးကို ဘုန်းကြီးကျောင်းဝင်းအတွင်းမှာ သတ်ဖြတ်ခဲ့

စစ်ကိုင်းတိုင်း၊ ဒီပဲယင်း ကွဲကျေးရွာကို အကြမ်းဖက်စစ်တပ်နဲ့ ကြွယ်ပုံ ပျူစောထီးတွေက လက်နက်ကြီးတွေနဲ့ ပစ်ခတ်စီးနင်းဝင်ရောက်ပြီး ရွှေဂူကြီးကျောင်းတိုက်ဆရာတော်တပါးနဲ့ အမျိုးသမီးငယ်(၁)ဦးကို ဇန်နဝါရီ(၆)ရက်၊ မနက် ၅ နာရီခန့်မှာ ဘုန်းကြီးကျောင်းဝန်းအတွင်းမှာပဲ သေနတ်နဲ့ ပစ်ခတ်သတ်ဖြတ်ခဲ့တယ်လို့ သိရပါတယ်။

အကြမ်းဖက်စစ်ကောင်စီတွေ သတ်ဖြတ်ခဲ့တဲ့ ရွှေဂူကြီးကျောင်းဆရာတော်ဟာ သီတဂူ ဗုဒ္ဓတက္ကသိုလ်က BA. Buddha ဘွဲ့ရရှိထားသူဖြစ်ပြီး သီတဂူ နာယက (၁ဝ)ပါး စာရင်းဝင် အရှင်ဂန္ဓသာရ (စာချဆရာတော်၊ မန္တလေးမြို့ မဟာမင်းဒင်စာသင်တိုက်) ဖြစ်တယ်လို့ စစ်ကိုင်းတိုင်း PDF တပ်ရင်း(၁)က သတင်းထုတ်ပြန်ထားတာပါ။

ရွှေဂူကြီးဆရာတော်နဲ့အတူ အသတ်ခံခဲ့ရတဲ့အမျိုးသမီးမှာ အသက် (၃၂) အရွယ်၊ မခင်စုမွန် ဆိုသူဖြစ်ပြီး အကြမ်းဖက်စစ်ကောင်စီတပ်ကို ဆရာတော်နဲ့အတူ တိမ်းရှောင်နေရင်း အတူတကွ အသတ်ခံခဲ့ရတယ်လို့ ဒေသခံတွေက ဆိုပါတယ်။

ကျေးရွာအတွင်းကို လက်နက်ကြီးတွေနဲ့ ပစ်ခတ်ဝင်ရောက်ခဲ့ပြီး အိမ်ခြေ ၅၀ ကျော်ကိုလည်း အကြမ်းဖက်စစ်တပ်နဲ့ ပျူစောထီးတွေက မီးရှို့ဖျက်ဆီးခဲ့ပြီး ဒေသခံ PDF တွေနဲ့လည်း တိုက်ပွဲ ဖြစ်ပွားခဲ့တယ်လို့ သိရပါတယ်။
©The Voice of Spring