ပုသိမ်ထောင်တွင်း အကြမ်းဖက်သတ်ဖြတ်မှုနဲ့ ပတ်သတ်ပြီး စုံစမ်းသိရှိထားသမျှ မှတ်တမ်းတွေကို UN နဲ့ နိုင်ငံတကာအဖွဲ့အစည်းတွေဆီ ပေးပို့၍ အရေးယူဖို့ NUG စီစဥ်လျက်ရှိ

ပုသိမ်ထောင်ဝန်ထမ်းတွေရဲ့ အကြမ်းဖက်မှုကြောင့် မတရား ဖမ်းဆီး အကျဉ်းချခံနေရတဲ့ ပြည်သူတဦး အသက်ဆုံးရှုံးခဲ့ရပြီး၊ (၇၀) ဦးခန့် ဒဏ်ရာရရှိခဲ့ကာ၊ (၁)ဦးပျောက်ဆုံးနေဆဲဖြစ်တယ်လို့ အမျိုးသားညီညွတ်ရေးအစိုးရ၊ လူ့အခွင့်အရေးဆိုင်ရာ ဝန်ကြီးဌာနက သတင်းထုတ်ပြန်ထားတာတွေ့ရပါတယ်။

သေဒဏ်ချမှတ်စီရင်မှုနဲ့ ပတ်သက်ပြီး ထောင်တွင်း ဆန္ဒဖော်ထုတ်မှုကို ဇန်နဝါရီလ (၅) ရက် ည (၁၁) နာရီခန့်မှာ ပြုလုပ်ခဲ့တာ​ကြောင့် (၈)ဦးကို ရိုက်နှက်နှိပ်စက်ခဲ့ပြီး (၇)ဦးကို တိုက်ပိတ်ခဲ့တယ်ဆိုပေမဲ့ အဲဒီအထဲမှာ ကိုဝင်းမင်းထက်ဟာ ပျောက်ဆုံးနေတယ်လို့ လူ့အခွင့်အရေးဆိုင်ရာ ဝန်ကြီး ဌာနက ဆိုပါတယ်။

ဇန်နဝါရီလ (၇) ရက်က အင်အား (၅၀)ခန့်ရှိတဲ့ ထောင်ဝန်ထမ်းတွေက မတရားဖမ်းဆီး အကျဉ်းချခံထားရသူတွေကို ဝင်ရောက် အကြမ်းဖက်နှိပ်စက်ခဲ့ကြပြီး ပစ်ခတ်မှု ကြောင့် ကိုဝေယံဖြိုး အသက်ဆုံးရှုံးခဲ့ရသလို ကျန်တဲ့ပြည်သူ (၉) ဦးမှာလည်း အသက်အန္တရာယ်စိုးရိမ်နေရတယ်လို့ သိရပါတယ်။

ထောင်တွင်းအကြမ်းဖက်မှုတွေမှာ ထောင်ဝန်ထမ်း မဟုတ်တဲ့ အကျဉ်းချခံထားရသူ အယောက် (၂၀) လောက်က ပါဝင်ကျူးလွန်ခဲ့ကြတာကို စုံစမ်းသိရထားပြီး NUG လူ့အခွင့်အရေးဆိုင်ရာဝန်ကြီးဌာန အနေနဲ့ ကုလသမဂ္ဂ အပါ အဝင် နိုင်ငံတကာအဖွဲ့အစည်းတွေဆီ မှတ်တမ်းပေးပို့ကာ အရေးယူဖို့ဆောင်ရွက်သွားမယ်လို့ ဖော်ပြထားပါတယ်။