အကြမ်းဖက်စစ်ကောင်စီရဲ့ တရားမဝင်ရွေးကောက်ပွဲ ကို ချင်းပြည်နယ် မည်သည့်နေရာမှ မပြုလုပ်ရန် CNO/CNDF တားမြစ်

■ လိုက်နာခြင်းမရှိပါက မည်သည့်ပုဂ္ဂိုလ်ကို မဆို ပြင်းထန်စွာ အရေးယူသွားမည်

တရားဝင် အစိုးရ ဖြစ်ရေး ကြိုးပမ်းနေတဲ့ အကြမ်းဖက် စစ်ကောင်စီ ရဲ့ တရားမဝင်ရွေးကောက်ပွဲ ကို ချင်းပြည်နယ်
ဖလမ်းမြို့နယ် နဲ့ အထက်ချင်းတွင်းဒေသအတွင်း လုံး၀ ပြုလုပ်ခြင်းမပြုရန် CNO/CNDF က ဇန်နဝါရီ (၁၁) ရက် မှာ ထုတ်ပြန်တားမြစ်လိုက်တယ်လို့ သိရပါတယ်။

အဲဒီလို တားမြစ်ထားတဲ့ ကြားကမှ အတုယောင်ရွေးကောက်ပွဲကို ဖြစ်မြောက်အောင်ကူညီမယ့် မည်သည့်ပုဂ္ဂိုလ်မျိုးကို မဆို CNO/CNDF က ပြင်းထန်စွာ အရေးယူသွားမှာဖြစ်ပါတယ်။

ဇန်နဝါရီ ၆ရက်ကနေ ၉ရက်အထိ ကျင်းပခဲ့တဲ့ ချင်းအမျိုးသားကာကွယ်ရေးတပ်ဖွဲ့ရဲ့ ဒုတိယအကြိမ်မြောက် ညီလာခံအစည်းအဝေးအပြီး ထုတ်ပြန်ချက်မှာ အခုလို ဖော်ပြခဲ့တာဖြစ်ပါတယ်။

CNO/CNDF အနေနဲ့ အာဏာရှင်စနစ်အမြစ်ပြတ်ချေမှုန်းရေး၊ ချင်းအမျိုးသားတည်ဆောက်ရေးနဲ့ ဖက်ဒရယ် ဒီမိုကရေစီပြည်ထောင်စုပေါ်ပေါက်ရေးအတွက် တော်လှန်ရေးအင်အားစုများနဲ့အတူ ဆုံးခန်းတိုင်အောင် ဆက်လက် တိုက်ပွဲဝင် သွားမယ်လို့လည်း ထုတ်ပြန်ခဲ့ပါတယ်။

လက်နက်မဲ့ပြည်သူတွေကို အကြမ်းဖက်သတ်ဖြတ်၊ ပြည်သူ့အိုးအိမ်များကို အကြောင်းမဲ့မီးရှို့ဖျက်စီး၊ ပြည်သူ့ကာကွယ်ရေးတပ်ဖွဲ့များအပေါ် စစ်ကြောင်း အဆမတန်ဖြင့် တိုက်ခိုက်နေတဲ့အပြင် လေကြောင်းနဲ့ပါ တိုက်ခိုက်နေတဲ့ အကြမ်းဖက်စစ်ကောင်စီရဲ့ တရားဝင်အစိုးရဖြစ်ရေးအတွက် ဦးဆောင်ပြုလုပ်မယ့် အတုအယောင် ရွေးကောက်ပွဲကို ချင်းအမျိုးသားကာကွယ်ရေးတပ်ဖွဲ့က လုံး၀တားမြစ်လိုက် တယ်လို့ ထုတ်ပြန်ထားတာဖြစ်ပါတယ်။