ဟားခါးမြို့ပေါ်က စျေးဆိုင်ခန်းတွေကို ချိတ်ပိတ် ပြီး ဆိုင်ရှင်တွေကို စစ်ကောင်စီဖမ်းဆီး

◼CNF ဌာနချုပ် လေကြောင်းတိုက်ခိုက်ခံရမှုအပေါ် ကန့်ကွက်ဆိုင်ပိတ်သိမ်း လှုပ်ရှားခဲ့တာကြောင့် ဖမ်းဆီးခြင်းဖြစ်

ဟားခါးမြို့ပေါ်က စျေးဆိုင်ခန်းတွေကို စစ်ကောင်စီက ချိတ်ပိတ်သိမ်းလိုက်ပြီး စျေးဆိုင်ပိုင်ရှင်တွေကိုလည်း ဇန်နဝါရီ (၁၂) ရက်မှာ ဖမ်းဆီးခဲ့တယ်လို့ ဟားခါးဒေသခံတွေဆီက သိရပါတယ်။

ချင်းအမျိုးသားတပ်မတော် (CNF/CNA)ဌာနချုပ်ကို စစ်ကောင်စီက လေကြောင်းကနေ ဗုံးကြဲတိုက်ခိုက်မှုအပေါ်ဝမ်းနည်းကြောင်း ပြသတဲ့အနေနဲ့ ဇန်နဝါရီ (၁၁) ရက် မှာ ဟားခါးမြို့ပေါ်က စျေးဆိုင်တွေပိတ်သိမ်း ပြီးကန့်ကွက် ဆန္ဒ ပြခဲ့ကြတာဖြစ်ပါတယ်။

အဲဒီလို လုပ်ဆောင်ခဲ့တဲ့အပေါ် စစ်ကောင်စီက ဇန်နဝါရီ (၁၂) ရက် နေ့လယ်မှာ ဆိုင်ရှင်တွေကိုလာရောက် ဖမ်းဆီးပြီး သူတို့ရဲ့ ဆိုင်တွေကို ချိတ်ပိတ်သိမ်းကြောင်းစာတွေ လာကပ်သွားတာဖြစ်ပါတယ်။

ဆိုင်ချိတ်ပိတ်သိမ်းခံရတဲ့ ဆိုင်ပိုင်ရှင်(၁၁) ဦးရှိပြီး သူတို့ကို ဟားခါးရဲစခန်းမှာ ဖမ်းဆီးထားတယ်လို့သိရပါတယ်။

ချင်းအမျိုးသားတပ်ဦး CNF ဗဟိုဌာနချုပ်ကို စစ်ကောင်စီတပ်က ဇန်နဝါရီလ ၁၀ ရက် နဲ့ ၁၁ ရက်နေ့တွေ က တိုက်လေယာဥ်နဲ့ နှစ်ရက်ဆက်တိုက်ဗုံးကြဲ တိုက်ခိုက်ခဲ့တာပါ။

ဇန်နဝါရီ ၁၀ ရက်နေ့ တိုက်ခိုက်မှုမှာ CNF တပ်ဖွဲ့ဝင် ငါးဦး သေဆုံးခဲ့ပြီး ဇန်နဝါရီလ ၁၁ ရက်နေ့ တိုက်ခိုက်မှုမှာတော့ သေဆုံးသူ၊ ထိခိုက်ဒဏ်ရာရသူမရှိခဲ့ဘဲ အဆောက်အဦးတွေ ပျက်စီးခဲ့တယ်လို့ CNF က ပြောဆိုထားပါတယ်။