လောင်းလုံးမြို့နယ် သကျက်တောရွာ ရဲစခန်း က အကြမ်းဖက် စစ်အုပ်စု နဲ့ ရဲအဖွဲ့တွေ စခန်းစွန့်ခွာထွက်ပြေး

လောင်းလုံးပြည်သူ့ကာကွယ်ရေးအဖွဲ့က စခန်းကို မီးရှို့ရှင်းလင်းနိုင်ခဲ့

လောင်းလုံးမြို့နယ် သကျက်တောရွာ နယ်မြေရဲစခန်း ကို တပ်စွဲထားတဲ့ အကြမ်းဖက် စစ်ကောင်စီ နဲ့ ရဲတပ်သားတွေဟာ ဇန်နဝါရီ (၁၃) ရက်မှာ စခန်းစွန့်ခွာ ထွက်ပြေးခဲ့တယ်လို့သိရပါတယ်။

အဲဒီအတွက် လောင်းလုံးပြည်သူ့ ကာကွယ်ရေးအဖွဲ့ (LLPDF)နဲ့ ထားဝယ် အထူး ပြောက်ကျားအဖွဲ့တို့ ပူးပေါင်းပြီးတော့ နယ်မြေရှင်းလင်းရေးတွေပြုလုပ်ခဲ့ကြပါတယ်။

နယ်မြေရှင်းလင်းရေးတွေလုပ်ဆောင်ပြီးချိန် ဇန်နဝါရီ (၁၆) ရက် ည (၁၁) နာရီ အချိန်မှာ အဲဒီ သကျက်တောရွာ နယ်မြေရဲစခန်း ကို ပူးပေါင်းအဖွဲ့ က မီးရှို့ ရှင်းလင်းခဲ့တာဖြစ်တယ်လို့သိရပါတယ်။

အဲဒီ ရဲစခန်း အထဲမှာရှိတဲ့ ပင်မဆောင်၊ အိပ်ခန်း၊ တန်းလျားတွေ အပါအဝင် အဆောက်အအုံ ၅ ခု ၊ ဘန်ကာ ၂ ခုတို့ကို ပါ မီးရှို့ ရှင်းလင်းခဲ့တယ်လို့ လောင်းလုံးပြည်သူ့ ကာကွယ်ရေးအဖွဲ့ (LLPDF)က ထုတ်ပြန်ထားပါတယ်။