မြင်းစီးရွာရှိ ပျူစခန်းကို ရွှေဘို PDF အဖွဲ့က အလစ်ဝင်တိုက်သဖြင့် ပျူ (၁၀)ဦးထက် မနည်းသေဆုံး

စစ်ကိုင်းတိုင်း ရွှေဘိုမြို့နယ် မြင်းစီးရွာရှိ ပျူစောထီးစခန်းကို ဒေသခံကာကွယ်ရေးတပ်ဖွဲ့တွေက ဇန်နဝါရီ (၂၅) ရက်မှာ အလစ်ဝင်တိုက်ခဲ့တာကြောင့် အများအပြားသေဆုံးနိုင်တယ်လို့ Shwebo Local People Defense Force အဖွဲ့ ရဲ့ ထုတ်ပြန်ချက်အရသိရပါတယ်။

အဲဒီတိုက်ခိုက်မှုမှာ ပျူစောထီး(၁၀) ဦးထက် မနည်းသေဆုံးနိုင်ပြီး ပြည်သူကာကွယ်ရေးတပ်ဖွဲ့ဘက်က ရဲဘော်(၂) ဦးကျည်ထိမှန်ခဲ့ပြီး (မစိုးရိမ်ရ) ဒဏ်ရာရရှိခဲ့တယ်လို့ Shwebo Local People Defense Force အဖွဲ့ က ပြောပါတယ်။
မြင်းစီးရွာ ရှိ ရွှေကျောင်းတိုက်မှာ ပျူစောထီးအချို့ကို ဖမ်းဆီးရမိထားပြီး မကြာမီမှာပဲ အကြမ်းဖက်စစ်ကောင်စီတပ်တွေ ရောက်ရှိလာကြောင့် ရဲဘော်များ အထိအခိုက် မရှိ ပြန်လည်ဆုတ်ခွာခဲ့ပြီး ရန်သူရဲ့လက်နက်တွေကိုတော့ မသိမ်းဆည်းလိုက်နိုင်ဘူးလို့ သိရပါတယ်။

ရွှေဘိုမြို့နယ်၊ တည်သီးတောကျေးရွာ နဲ့ ရွာသာကျေးရွာရှိ ပျူအဖွဲ့တွေကိုလည်း ဒေသတွင်းတော်လှန်ရေးအင်အားစုတွေက ဇန်နဝါရီ (၂၂) ရက်မှာ တိုက်ခိုက်ခဲ့သေးတယ်လို့သိရပါတယ်။