အကြမ်းဖက် စစ်ကောင်စီ ရဲ့ မတူပီနယ်မြေအတွင်း ရွေးကောက်ပွဲပြင်ဆင်မှုကို CDF-Matupi က တိုက်ခိုက်တားမြစ်

◼ အကြမ်းဖက် စစ်ကောင်စီ ကင်းစခန်းများကို CDF တိုက်ခိုက်နိုင်ခဲ့ ၊ စစ်ကောင်စီဘက်က ထိခိုက်ဒဏ်ရာရမှုများပြား

အကြမ်းဖက် စစ်ကောင်စီ က မတူပီမြို့နယ်အတွင်းရှိ နယ်မြေတွေကို ရွေးကောက်ပွဲ ကျင်းပနိုင်ရေး ပြင်ဆင်နေတာကို ဟန့်တားတဲ့ အနေနဲ့ CDF – Matupi တပ်ဖွဲ့က မတူပီ – ပလက်ဝလမ်း ၊ မတူပီ – မင်းတပ်လမ်း၊ မတူပီ – ဘွေရာလမ်း၊ မတူပီ-ဟားခါးလမ်း တွေမှာ ရှိတဲ့ အကြမ်းဖက်စစ်ကောင်စီဂိတ် တွေ ကို ပစ်ခတ်တိုက်ခိုက်ခဲ့တယ်လို့ ဇန်နဝါရီ (၂၇) ရက်မှာ CDF – Matupi ရဲ့ သတင်းနဲ့ ပြန်ကြား ရေး က ထုတ်ပြန်ထားချက်အရသိရပါတယ်။

မတူပီ – ဘွေရာလမ်းမှာ တပ်စွဲထားတဲ့ စစ်ကောင်စီ ကင်းစခန်းတခုကို CDF-Matupi က ဇန်နဝါရီ (၂၅) ရက် မနက် ၄ နာရီခွဲ အချိန်က တိုက်ခိုက်ခဲ့တဲ့အခါမှာ စစ်ကောင်စီဘက် က အများအပြားဒဏ်ရာရရှိခဲ့ တယ်လို့ ထုတ်ပြန်ဖော်ပြထားပါတယ်။
အဲဒီလို တိုက်ခိုက်ခဲ့တဲ့အတွက် အကြမ်းဖက်စစ်ကောင်စီဘက်က (၁၈) ဦးသေဆုံးခဲ့ပြီး အများအပြားဒဏ်ရာရရှိခဲ့ပြီး CDF-Matupi ဘက်ကရဲဘော်(၁) ဦး နဲ့ ပြည်သူ (၂) ဦးတို့ လည်း ထိခိုက်ကျဆုံးခဲ့ရပါတယ်။

CDF – Matupi တပ်ဖွဲ့ အနေနဲ့လည်း ကျန်ရဲဘော်များ အထိအခိုက်မရှိအောင် ပြန်လည်ဆုတ်ခွာနိုင်ခဲ့တယ်လို့ထုတ်ပြန်ဖော်ပြ ထားတာဖြစ်ပါတယ်။

အခုလို အခြေအနေတွေကြောင့် မိဘပြည်သူတွေအနေနဲ့ CDF – Matupi ရဲ့ ခွင့်ပြုချက်မရဘဲ နဲ့ ခရီး သွားလားခြင်းတွေ မပြုလုပ်ကြဖို့အတွက်ကိုလည်း (အထူး) သတိပေးချက် အနေနဲ့ ထုတ်ပြန်ထားတယ်လို့သိရပါတယ်။