မြန်မာနိုင်ငံရှိ စစ်ဘေးနှင့် မီးဘေးသင့်ပြည်သူများကို အကူအညီပေးနိုင်ရန် ရန်ပုံငွေ အထူးတရားပွဲ ဘန်ကောက်တွင် ကျင်းပမည်

ထိုင်းနိုင်ငံ၊ ဘန်ကောက်မြို့၊ စူစဝပ် 74 လမ်းရှိ ဝပ်ချုံကျောင်းတိုက်မှာ မြန်မာနိုင်ငံရှိ စစ်ဘေးနဲ့ မီးဘေးသင့်ပြည်သူများကို အကူအညီပေးနိုင်ရန် ရည်ရွယ်ပြီး ရွှေဝါရောင်ဆရာတော် အရှင်ထာဝရ (နော်ဝေ) ရဲ့ အထူးတရားပွဲကို ဇန်နဝါရီ (၂၉)ရက်၊ ညနေ (၆)နာရီခန့်မှာ စတင်ပြုလုပ်သွားမယ်လို့ သိရပါတယ်။

မဟတ္တမဂန္ဒီ ငြိမ်းချမ်းရေးဆု ရရှိထားတဲ့ ဆရာတော် အရှင်ထာဝရ ဟာ ဥရောပနိုင်ငံတွေ အပါအဝင် ဂျပန်၊ မလေးရှား အစရှိတဲ့ နိုင်ငံတွေသို့ ကြွရောက်၍ အထူးတရားပွဲတွေပြုလုပ်ပြီး ရရှိသမျှ အလှူငွေတွေကို မီးဘေး၊ စစ်ဘေးသင့်ပြည်သူတွေကို ကူညီလှူဒါန်းနေတာ ဖြစ်ပါတယ်။

“စစ်ကိုင်းက ဘုန်းဘုန်းတို့ ပြည်သူတွေ ဒုက္ခ အတိရောက်နေကြတယ်၊ နေ့စဥ် လူရာနဲ့ချီပြီး ဘုန်းဘုန်းဆီမှာ အကူအညီတောင်းနေကြတယ်၊ ဘယ်လိုနှလုံးသားနဲ့ ဘုန်းဘုန်းတို့ မျက်နှာလွှဲလို့ရမှာလဲ၊ ပြည်သူတွေက လှူဒါန်းတဲ့အလှူငွေနဲ့ပဲ တနေ့ကို ကျပ်သိန်းတရာလောက် လိုအပ်တဲ့နေရာတွေကို မဖြစ်မနေ ပို့နေရတယ်”လို့ ဆရာတော် အရှင်ထာဝရ(နော်ဝေ)က မိန့်ပါတယ်။

ဆရာတော် အရှင်ထာဝရက မဲဆောက်မြို့သို့ ဇန်နဝါရီ ၂၅ ရက်မှာ ကြွရောက်ခဲ့ပြီး CDM ကျောင်းဆရာအချို့နဲ့ CDM စစ်သားအချို့တို့ကို သွားရောက်တွေ့ဆုံ အားပေးစကားပြောကြားခဲ့ပြီး စားနပ်ရိက္ခာနဲ့ အလှူငွေအချို့ ပေးအပ်ခဲ့ပါတယ်။

ဒါ့အပြင် စစ်ဘေးရှောင်၊ ရွှေ့ပြောင်းမြန်မာကျောင်းသားတွေရဲ့ GED စာမေးပွဲကြေးအတွက် ကနဦး အလှူငွေ USD (၁၆၀၀) ခန့်၊ ဒဏ်ရာရ PDF စစ်သည်တွေကို ကျန်းမာရေးစောင့်ရှောက်မှုပေးနေတဲ့အဖွဲ့အစည်းတခုကို ကျပ်ငွေ သိန်း ၁၀၀ ခန့်နဲ့ ဘတ်ငွေ (၂၀၀၀၀) ခန့်တို့ကို ဇန်နဝါရီ ၂၇ ရက်မှာ ​သွားရောက်တွေ့ဆုံပြီး ထောက်ပံ့လှူဒါန်းခဲ့တယ်လို့ သိရပါတယ်။