ကရင်အမျိုးသားများနဲ့အတူ တိုင်းရင်းသားပြည်သူတရပ်လုံး က အကြမ်းဖက် စစ်အာဏာရှင်ကို ရွပ်ရွပ်ချွံချွံ ခုခံတွန်းလှန်သွားမည်

ကရင်ပြည်သူလူထု၏ အသက်အိုးအိမ်စည်းစိမ်တွေကို ကာကွယ်စောင့်ရှောက်ရင်း အသက် ၊ ကိုယ်လက်အင်္ဂါများစွန့်လွှတ်ပေးဆပ်ခဲ့ရတဲ့ ကရင့်အာဇာနည်ခေါင်းဆောင်ကြီးများ ၊ ကရင်သူရဲကောင်းများ နဲ့ ကရင်ပြည်သူတွေကို လေးနက်စွာ အောက်မေ့ဦးညွှတ် ဂုဏ်ပြုအပ်ပါကြောင်းကို ဇန်နဝါရီ (၃၁) ရက်မှာ ပြုလုပ်တဲ့ (၇၄)နှစ်မြောက်ကရင့်တော်လှန်ရေးနေ့ကို ပေးပို့တဲ့ NUG ကာကွယ်ရေးဝန်ကြီးဌာန ရဲ့ သဝဏ်လွှာမှာ ဖော်ပြပါရှိတယ်လို့သိရပါတယ်။

ဖက်ဒရယ် ဒီမိုကရေစီ ပြည်ထောင်စုကို ထူထောင်နိုင်ဖို့ အတွက် တိုင်းရင်းသားပြည်သူလူထုတရပ်လုံးက စစ်အာဏာရှင်စနစ်ကို အပြီးတိုင်ဖြုတ်ချပြီး ကိုယ်ပိုင်အုပ်ချုပ်ခွင့် ၊ကိုယ်ပိုင် ပြဌာန်းခွင့် ၊ တန်းတူအခွင့်အရေး ရရှိရေးနဲ့ တရားမျှတမှုတို့ ကို လက်တွဲညီညီ အားထုတ်နိုင်လိမ့်မယ်လို့ ယုံကြည်ကြောင်း ကို အမျိုးသားညီညွှတ်ရေးအစိုးရ (NUG) ကာကွယ်ရေးဝန်ကြီးဌာန က သဝဏ်လွှာမှာ ထုတ်ပြန်ဖော်ပြထားပါတယ်။

ယနေ့ အချိန်အခါဟာ ကရင်အမျိုးသားများနဲ့ အတူ တိုင်းရင်းသားပြည်သူလူထုတရပ်လုံး ကြုံတွေ့ခံစားနေရတဲ့
စစ်အာဏာရှင်စနစ်ဆိုးနဲ့ အကြမ်းဖက်စစ်တပ်ရဲ့ ဆိုးသွမ်းယုတ်မာတဲ့ လုပ်ရပ်တွေကို ကျော်လွှားနိုင်ဖို့ တတိုင်းပြည် လုံး အာဏာသိမ်းစစ်ကောင်စီ ကို ဟန်ချက်ညီစွာနဲ့ ရွပ်ရွပ်ချွံချွံ ခုခံတွန်းလှန်နေတဲ့ အချိန်ကာလဖြစ်တယ်လို့ ဖော်ပြထားပါတယ်။

KNUဥက္ကဋ္ဌ ဗိုလ်ချုပ်ကြီးစောမူတူးစေးဖိုးကလည်း ခုခံတော်လှန်ရေး မုချအောင်မြင်ရမည်ဖြစ်ပြီး ၊ မိမိတို့ ရဲ့ ရည်မှန်းချက် ပန်းတိုင်ပြီးမြောက်အောင်မြင်သည်အထိဆုံးခန်းတိုင်အောင် ကြိုးပမ်းအားထုတ်ကြဖို့အတူတကွ ပူးပေါင်းလုပ်ဆောင်ကြရမှာ ဖြစ်တယ်လို့ ပြောကြားခဲ့တာဖြစ်ပါတယ်။