ထန်တလန်မြို့မ ရဲစခန်းကို CNF တိုက်ခိုက်သိမ်းပိုက်ပြီး လက်နက်အများအပြားရရှိ

စစ်အုပ်ချုပ်ရေးကြေညာခံထားရတဲ့ ချင်းပြည်နယ်၊ ထန်တလန်မြို့မ ရဲစခန်းကို ချင်းအမျိုးသားတပ်မတော်က ဖေဖော်ဝါရီ (၈)ရက်၊ ည (၉) နာရီခန့်မှာ တိုက်ခိုက်သိမ်းပိုက်နိုင်ခဲ့ပြီး သေနတ် (၄၀) ကျော်ခန့် သိမ်းဆီးရမိတယ်လို့ သိရပါတယ်။

တနာရီကျော်ကြာ တိုက်ပွဲဖြစ်ပွားခဲ့ပြီး စစ်ကောင်စီတပ်သား(၄)ဦးထက်မနည်း သေဆုံးခဲ့သလို CNA/CNF ဘက်မှ ရဲဘော်(၁)ဦး ကျဆုံးခဲ့ပါတယ်။

ထန်တလန်မြို့မ ရဲစခန်းကို သိမ်းပိုက်ပြီးနောက်တွေ့ရစဉ်။ Photo-CNF

ထန်တလန်မြို့မရဲစခန်းကို စစ်ကောင်စီရဲတပ်သား(၄၀)ခန့်က တပ်စွဲထားတာဖြစ်ပြီး တိုက်ပွဲဖြစ်ပွားစဉ် အနီးရှိ စစ်တပ်မှ စစ်ကူ မလာခဲ့သလို လေကြောင်းပစ်ကူလည်း မပေးနိုင်ခဲ့ပါဘူး။

သိမ်းဆည်းရမိတဲ့ လက်နက်တွေထဲမှာ ဒရုန်းကို ပစ်ချသည့် အမျိုးအစားလည်းပါဝင်ကြောင်း CNF က ဓာတ်ပုံ နဲ့ တကွ ထုတ်ပြန်ထားပါတယ်။

လက်ရှိအချိန်မှာတော့ ထန်တလန်မြို့မ ရဲစခန်းအနီးကို စစ်ကောင်စီက တိုက်လေယာဉ်သုံးပြီး လေကြောင်းတိုက်ခိုက်မှုတွေ လုပ်နေတယ်လို့ သိရပါတယ်။