ဘီးလင်းမြို့နယ် မင်းစောရွာကို အကြမ်းဖက်စစ်တပ်က လက်နက်ကြီးနဲ့ ပစ်ခတ်သဖြင့် လူနေအိမ် (၉)လုံး ပျက်စီး

ကရင်အမျိုးသားအစည်းအရုံး ကော်သူးလေ အုပ်ချုပ်နယ်မြေ၊ ဒူးသထူခရိုင် တပ်မဟာ(၁)၊ ဘီးလင်းမြို့နယ်၊ တဂေးလောင်းကျေးနယ်၊ မင်းစောရွာအတွင်းကို ဖေဖေါ်ဝါရီ (၇) ရက် ည (၇) နာရီခွဲအချိန်မှာ အကြမ်းဖက်စစ်တပ်ရဲ့ ကိုးနဝင်း တပ်စခန်းက လက်နက်ကြီး (၂)လုံး နဲ့ ပစ်ခတ်ခဲ့တာကြောင့် လူနေအိမ် ၉ လုံး ပျက်စီးခဲ့ရတယ်လို့ KNU ဗဟိုရဲ့ သတင်းထုတ်ပြန်ချက်အရ သိရပါတယ်။

အကြမ်းဖက်စစ်တပ်ရဲ့ကိုးနဝင်းစခန်း ဟာ ကေအဲန်ယူ-မူတြော်ခရိုင်အတွင်းမှာ တပ်စွဲထားတာဖြစ်ပြီး မင်းစောကျေးရွာအတွင်းကိုလက်နက်ကြီး တွေနဲ့ ပစ်ခတ်မှုများရှိခဲ့တယ်လို့ KNU ဗဟိုက ထုတ်ပြန်ထားတာပါ။

လက်နက်ကြီး ကျည်စထိမှန်ခဲ့တဲ့ အိမ်ပိုင်ရှင်တွေက (၁)တီးကွေးလေး၊ (၂)မောင်သန်းကျော်၊ (၃)ထွန်းသန်းပါး၊ (၄)ကျောနကူး၊ (၅)မောင်သိန်းဝင်းမိုး၊ (၆)တီးချာဘိ၊ (၇)ဖီးမုဒေး၊ (၈)တီးထို့ကလူနှင့် (၉)ယားမဝိုင်းမို့ တို့ဖြစ်တယ်လို့ KNU က အသိပေးထုတ်ပြန်ထားတယ်လို့သိရပါတယ်။