ရွှေဘို အနောက်ခြမ်း မှာ အကြမ်းဖက်စစ်တပ်နဲ့ ‌‌‌ ဒေသကာကွယ်ရေး တပ်ဖွဲ့များ ထိတွေ့ တိုက်ပွဲပြင်းထန်

◼ စစ်ကောင်စီဘက်က အထိနာသဖြင့် ရွာ(၃) ရွာထက်မနည်းတနေကုန်မီးရှို့ဖျက်ဆီး

စစ်ကိုင်းတိုင်း ရွှေဘိုမြို့နယ် အနောက်ဘက်ခြမ်း မှာ အကြမ်းဖက်စစ်ကောင်စီတပ်နဲ့ ဒေသကာကွယ်ရေး တပ်တို့
ဖေဖေါ်ဝါရီ (၁၂) ရက် မနက်ပိုင်းမှာ နှစ်ဘက်တိုက်ပွဲ ဖြစ်ပွားလျက်ရှိတယ်လို့ တော်လှန်ရေးအင်အားစုတွေဆီက သိရပါတယ်။

အဲဒီတိုက်ပွဲမှာ စစ်ကောင်စီဘက်က အထိနာတဲ့အတွက် အကြမ်းဖက်စစ်အုပ်စုဟာ အနီးအနားက ရွာ(၃)ရွာထက်မနည်းကို
တနေကုန် ဆက်တိုက်မီးရှို့ဖျက်ဆီးသွားခဲ့တယ်လို့ ဒေသခံတွေက ပြောပါတယ်။

ရွှေဘိုမြို့နယ်၊ သီးလုံးရွာမှ စစ်ကောင်စီတပ်နှင့်ပျူ အင်အား ၅၀ခန့် ဟာ ဖေဖေါ်ဝါရီ (၁၂) ရက်မှာ ကျောက်မြင့်ရွာဘက် ကို လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်ခဲ့စီးနင်း ခဲ့တာပါ။

အဲဒီလို ဝင်ရောက်စီးနင်းစဉ်မှာ ဒေသခံကာကွယ်ရေးအဖွဲ့တွေ ထောင်ထားတဲ့ မိုင်းထိခဲ့ပြီး စစ်အုပ်စုဘက်က ထိခိုက်မှုရှိခဲ့တယ်လို့ တော်လှန်ရေးအင်အားစုတွေက ထုတ်ပြန်အသိပေးထားပါတယ်။

မိုင်းထိထားတဲ့ အကြမ်းဖက် စစ်ကောင်စီတပ်ဟာ ကျောက်မြင့်ရွာကို မီးရှို့ဖျက်ဆီးခဲ့ပြီး တင့်တယ်ရွာ (ဒင်းဒဲရွာ)ကို ဆက်ထွက်လာရာ ရွှေဘိုတိုက်နယ် (၂)ဒေသခံကာကွယ်ရေးအဖွဲ့များ၊ မဟာမိတ်အဖွဲ့များနှင့်ထိတွေ့ တိုက်ပွဲဖြစ်ပွားခဲ့ကြပြီး စစ်ကောင်စီတပ်နဲ့ ပျူများ ထိခိုက်သေဆုံးမှုရှိခဲ့တယ်လို့သိရပါတယ်။

အကြမ်းဖက် စစ်ကောင်စီတပ်ဟာ တင့်တယ်(ဒင်းဒဲ)ရွာကိုလည်း ထပ်မံ မီးရှို့ဖျက်ဆီးသွားခဲ့ပါတယ်။

အကြမ်းဖက် စစ်ကောင်စီတပ် ဟာ ဖေဖော်ဝါရီ (၁၃) ရက် မနက်ပိုင်းက ရွှေဘိုမြိုနယ် ချီပါအုပ်စု ငါးဆူကုန်းရွာကိုပါ မီးစတင်ရှို့ဖျက်ဆီးနေတယ်လို့ WetLet Information Networks အဖွဲ့က ထုတ်ပြန်ထားတယ်လို့သိရပါတယ်။