တပ်မ(၄၄)စစ်မှုထမ်းဟောင်းဖြစ်သူ ပျူစောထီးစစ်သင်တန်းဆရာတဦး ပစ်ခတ်ခံရသဖြင့် သေဆုံး

မွန်ပြည်နယ် ပေါင်မြို့နယ်က အကြမ်းဖက်စစ်ကောင်စီ လက်အောက်ခံ မြို့နယ်ပြည်သူ့စစ်ခေါင်းဆောင်ဆိုသူတဦးကို နန်းထိုက်အောင်စစ်ဆင်ရေးအဖြစ် ဖေဖေါ်ဝါရီ (၁၅)ရက် မနက်ပိုင်းမှာ ပစ်ခတ်ခဲ့တယ်လို့ တောင်ပိုင်းစစ်ဒေသ SOF အထူးတပ်ဖွဲ့က ထုတ်ပြန်ချက်အရ သိရပါတယ်။

ပေါင်မြို့နယ် ရင်ငြိမ်းကျေးရွာရှိ မြို့နယ်ပြည်သူ့စစ်ခေါင်းဆောင် မြင့်ရီ(ခ)ပေါပီဆိုသူကို ရင်ငြိမ်းရွာတောင်ပိုင်း ငွေလျှံလက်ဖက်ရည်ဆိုင်ထဲမှာ ဝင်ရောက်ပစ်ခတ်ခဲ့တာ ဖြစ်တယ်လို့ SOF အထူးတပ်ဖွဲ့က ပြောပါတယ်။

စစ်ဆင်ရေးလုပ်ဆောင်စဥ် လက်ဖက်ရည်ဆိုင်အတွင်း အခြားပျူစောထီးအဖွဲ့ဝင်များရှိနေတာကြောင့် စစ်ရေးပစ်မှတ်ထံက လက်နက်ရှာဖွေသိမ်းဆည်းနိုင်ခြင်းမရှိခဲ့ဘဲ ပြန်ဆုတ်ခဲ့ရကြောင်း SOF အထူးတပ်ဖွဲ့က ထုတ်ပြန်အသိပေးထားပါတယ်။

အဆိုပါ ပေါင်မြို့နယ် ပြည်သူ့စစ်ခေါင်းဆောင် မြင့်ရီ(ခ)ပေါပီအား ပစ်ခတ်ရာမှာ ဦးခေါင်းတချက်၊ ရင်ဘတ်နှစ်ချက်၊ ဆီးခုံ တချက်(Zip Drill)ပစ်ခတ်ခဲ့တာဖြစ်တာကြောင့် နေရာမှာတင် သေဆုံးသွားတယ်လို့ သိရပါတယ်။

ပစ်ခတ်ခံရတဲ့ ပြည်သူ့စစ်ခေါင်းဆောင်ဆိုသူဟာ အကြမ်းဖက် စစ်ကောင်စီလက်အောက်ရှိ ပြည်သူ့စစ်ခေါင်းဆောင်အဖြစ် ပျူစောထီးအဖွဲ့တွေကို စစ်သင်တန်းပေးနေတဲ့သူတဦးဖြစ်ပြီး ရင်ငြိမ်းရဲစခန်းမှာ ညစဥ်လုံခြုံရေးကင်းစောင့် လေ့ရှိတယ်လို့ ထုတ်ပြန်ထားပါတယ်။