နဂါးနီစစ်ကြောင်းကို အမျိုးသားညီညွတ်ရေးအစိုးရက လက်နက်တပ်ဆင်ပေးခဲ့

◼ ရဲဘော်တွေရဲ့ တော်လှန်ရေး စိတ်ဓာတ်မာကြောနေမှုကို တာဝန်ရှိသူများက ဂုဏ်ပြုစကားပြောကြား

ကရင်အမျိုးသားအစည်းအရုံး (KNU) နယ်မြေရှိ နဂါးနီစစ်ကြောင်း တိုက်ပွဲဝင် ရဲဘော်များကို အမျိုးသားညီညွတ်ရေးအစိုးရ တောင်ပိုင်းစစ်ဒေသတပ်မှူးများက ဖေဖေါ်ဝါရီ (၁၄) ရက်မှာ လက်နက်တပ်ဆင်ပေးအပ်ခဲ့တယ်လို့ နဂါးနီ စစ်ကြောင်းရဲ့သတင်းထုတ်ပြန်ချက်အရသိရပါတယ်။

အဲဒီလက်နက်တပ်ဆင်ပွဲကို တောင်ပိုင်းစစ်ဒေသ ဒုစစ်ဒေသမှူး ရဲဘော်စောရှားနဲ့ တောင်ပိုင်းစစ်ဒေသ၊ တာဝန်ရှိပုဂ္ဂိုလ်တွေက စစ်ဒေသခွဲအမှတ် (၃)အတွင်းရှိ ပြည်သူ့ကာကွယ်ရေးတပ်မတော် ရဲ့ နဂါးနီစစ်ကြောင်းကို လက်နက်တွေပေးအပ်တပ်ဆင်ခဲ့တာ ဖြစ်ပါတယ်။

ဒ့ါအပြင် စစ်ဒေသခွဲ အမှတ်(၃)အတွင်း စစ်ဆင်ရေးနဲ့ ပတ်သက်ပြီး ပြင်ဆင်ဆောင်ရွက်နေတဲ့ အခြေအနေတွေကို ရဲဘော်များ သိရှိစေရန်အတွက် ရှင်းလင်းပြောကြားခဲ့ကြတယ်လို့သိရပါတယ်။

နွေဦးတော်လှန်ရေးရဲ့ ၂ နှစ်ကျော်ကာလအတွင်းမှာ စစ်အာဏာရှင်စနစ် အမြစ်ပြတ် ချေမှုန်းရေးအတွက် ရဲဘော်တွေရဲ့ စိတ်ဓာတ်မာကြောနေမှုကို ဂုဏ်ပြုကြောင်း တာဝန်ရှိသူတွေက ပြောကြားခဲ့ကြပါတယ်။

နဂါးနီစစ်ကြောင်းဟာ KNU တပ်မဟာ(၆) နယ်မြေမှာလက်ရှိ တိုက်ပွဲဝင်နေတဲ့ စစ်ကြောင်းတခုဖြစ်ပါတယ်။

အမျိုးသားညီညတ်ရေးအစိုးရ ကာကွယ်ရေးဝန်ကြီးဌာနအနေနဲ့ KNUနယ်မြေက စစ်ကြောင်းများအပါအဝင် ဒေသအသီးသီးက ပြည်သူ့ကာကွယ်ရေးတပ်တွေကို လက်နက်တပ်ဆင်ဖြည့်တင်းမှုများ ဆက်တိုက် ပြုလုပ်ပေးလျက်ရှိတယ်လို့သိရပါတယ်။