အမေရိကန်က မြန်မာနိုင်ငံအတွက် ဒေါ်လာသန်း(၅၀) ထပ်မံ ကူညီမည်

မြန်မာနိုင်ငံအတွက် လူသားချင်းဆိုင်ရာ အကူအညီအဖြစ် အရေးပေါ်စားနပ်ရိက္ခာနဲ့ အာဟာရအထောက်အပံ့တွေအတွက် အမေရိကန်ပြည်ထောင်စုက အမေရိကန်နိုင်ငံတကာဖွံ့ဖြိုးရေးအေဂျင်စီ (USAID) ကတဆင့် ကန် ဒေါ်လာ သန်း (၅၀)ကို ထပ်မံထောက်ပံ့သွားမှာ ဖြစ်တယ်လို့ ဖေဖေါ်ဝါရီ (၁၅) ရက်မှာ (USAID) က သတင်းထုတ်ပြန်ထားချက်အရ သိရပါတယ်။

မြန်မာနိုင်ငံမှာ တိုးမြင့်လာတဲ့ နေရပ်စွန့်ခွာရမှုတွေ လက်နက်ကိုင်ပဋိပက္ခတွေနဲ့ စားနပ်ရိက္ခာပိုမိုရှားပါးလာမှုတွေက ရှိရင်းစွဲလိုအပ်ချက်တွေနဲ့ ပေါင်းနေတဲ့ ဒေသတွေအတွက် လူသားချင်းဆိုင်ရာအကူအညီအဖြစ် အရေးပေါ်စားနပ်ရိက္ခာနဲ့ အာဟာရအထောက်အပံ့တွေအတွက် အခုလို အကူအညီ ပေးအပ်တာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

USAID အနေနဲ့ ကုလသမဂ္ဂ ကမ္ဘာ့စားနပ်ရိက္ခာအစီအစဉ်နဲ့ အတူ ပဋိပက္ခဖြစ်ပွားနေတဲ့ ပြည်နယ်တွေက လူပေါင်း ၇၅၀,၀၀၀ ကျော်ကို အာဟာရချို့တဲ့မှုကုစားဖို့နဲ့ ကာကွယ်ရန် ကူညီနိုင်မယ်လို့ ဆိုပါတယ်။

အခုထောက်ပံ့မှုမှာ လစဉ်စားနပ်ရိက္ခာခွဲတမ်းတွေပေးအပ်တာ အသက်ငါးနှစ်အောက်ကလေးငယ်တွ ကိုယ်ဝန်ဆောင် မိခင်တွေနဲ့ နို့တိုက်မိခင်တွေအတွက် အာဟာရဖြစ်စားသုံးကုန်တွေပေးအပ်သွားမှာ ဖြစ်တယ်လို့ သိရပါတယ်။

ကမ္ဘာ့ကုလသမဂ္ဂက လတ်တလောထုတ်ပြန်ခဲ့တဲ့ လူသားချင်းစာနာမှုဆိုင်ရာလိုအပ်ချက်တွေအရ မြန်မာနိုင်ငံမှာ လူဦးရေ ၁၇ သန်းကျော် ထဲမှာ လူသုံးဦးတွင် တဦးခန့် – ဟာ ၂၀၂၃ ခုနှစ် အတွင်းလူသားချင်းစာနာမှုဆိုင်ရာအထောက်အပံ့တွေကို လိုအပ်နေတယ်လို့ ထုတ်ပြန်ချက်မှာ ထည့်သွင်းဖော်ပြထားတာတွေ့ရပါတယ်။