စစ်ကြောင်းထိုးခံရသဖြင့် ဆိပ်ဖြူရှိဒေသခံတသောင်းခန့်နေရပ်စွန့်ခွာထွက်‌ပြေးနေရ

◼️ စစ်ကောင်စီ လက်နက်ကြီးပစ်ခတ်မှုကြောင့် ‌ဒေသခံ (၂) ဦးလက်နက်ကြီးထိမှန်ဒဏ်ရာရ ၊ နေအိမ်(၃)လုံးထက်မနည်းပျက်စီးခဲ့

အကြမ်းဖက်စစ်ကောင်စီတပ်က ဖေဖေါ်ဝါရီ(၁၃)ရက်မှာ အင်အား (၃၀၀) နဲ့ စစ်ကြောင်းထိုးလာတာကြောင့် မကွေးတိုင်း၊ ဆိပ်ဖြူမြို့နယ်ရှိ ရွာ(၉)ရွာမှ ဒေသခံ တသောင်းခန့်ဟာ နေရပ်စွန့်ခွာထွက်ပြေးနေရတယ်လို့ သိရပါတယ်။

ဆိပ်ဖြူမြို့နယ်ထဲက ဘဲကျ၊ သံပုရာပင်၊ သပြေ၊ အနောက်ကဖြူ၊ ရွာမ(တောင်)၊ သာယာကုန်း၊ သက္ကယ်ကျင်း၊ ကျစ်ပြင်စတဲ့ ရွာတွေအပါအဝင် ရွာ(၉)ရွာက ဒေသခံတွေဟာ ဘေးလွတ်ရာကို ထွက်ပြေးတိမ်းရှောင်နေကြရတာ ဖြစ်ပါတယ်။

အကြမ်းဖက် စစ်ကောင်စီတပ်က ဘဲကျရွာထဲကို လက်နက်ကြီးနဲ့ပစ်လို့ အသက်(၆၀)ကျော်အရွယ်အမျိုးသားတဦးနဲ့ အသက် (၅၀)ကျော်အရွယ် အမျိုးသားတဦးတို့ လက်နက်ကြီးထိမှန်ပြီး ဒဏ်ရာရခဲ့ကြပြီး လက်နက်ကြီးကြောင့် နေအိမ် သုံးလုံးထက်မနည်း ပျက်စီးခဲ့ရတယ်လို့သိရပါတယ်။