ခင်ဦးမြို့နယ်ရှိ လက်ပံလှရွာကို မီးရှို့ဖျက်ဆီးပြီး သီလရှင်(၁)ပါးကို စစ်ကောင်စီတပ်က မီးရှို့သတ်ဖြတ်ခဲ့

◼ဒေသခံနေအိမ်(၂၅၀)မီးလောင်ဆုံးရှုံးပြီး အသက်(၇၀) အရွယ် သီလရှင်တပါး နေအိမ်ထဲတွင် မီးရှို့ သတ်ဖြတ်ခံရ

စစ်ကိုင်းတိုင်း၊ ခင်ဦးမြို့နယ်ရှိ လက်ပံလှကျေးရွာကို အကြမ်းဖက် စစ်ကောင်စီတပ်က ဖေဖော်ဝါရီ(၁၃)ရက် ညနေပိုင်းမှာ မီးရှို့ဖျက်ဆီးခဲ့ပြီးနောက် အသက် (၇၀)အရွယ် သီလရှင်ဆရာတပါးကိုလည်း မီးရှို့သတ်ဖြတ်ခဲ့တယ်လို့ ခင်ဦးမြို့နယ် သတင်းမှန်ပြန်ကြားရေး အဖွဲ့ရဲ့ ထုတ်ပြန်ချက်အရ သိရပါတယ်။

အကြမ်းဖက် စစ်ကောင်စီတပ်နဲ့ မကျီးတုံကျေးရွာမှ ပျူစောထီးများပါတဲ့ အင်အား(၁၀၀)ခန့်စစ်ကြောင်းဟာ ဒေသခံများရဲ့နေအိမ်(၂၅၀) ကျော်ကို မီးလောင်ဗုံးတွေ၊ ရေနံဆီမီးစာတွေနဲ့မီးရှို့ဖျက်ဆီးခဲ့ကြတာဖြစ်တယ်လို့ ခင်ဦးမြို့နယ်သတင်းမှန်ပြန်ကြားရေးအဖွဲ့က ထုတ်ပြန်ထားပါတယ်။

အဲဒီလိုမီးရှို့ဖျက်ဆီးပြီး နောက်မှာ ကျေးရွာထဲက အသက်(၇၀)အရွယ် သီလရှင်ဆရာတဦးကိုနေအိမ်အတွင်းမှာပဲ မီးရှို့သတ်ဖြတ်ခဲ့ကြတယ်လို့ ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောပါတယ်။

အင်အား ၁၀၀ ခန့်ပါ အကြမ်းဖက် စစ်ကောင်စီတပ်တွေဟာ ဖေဖော်ဝါရီ (၈ )ရက်မှာ ရေဦးမြို့ကတဆင့် ဝင်ရောက်လာပြီးနောက် သနပ်စိန်၊ စောကြီး၊ ကွမ်းတိုင်း၊ မင်းကံကြီး၊ လက်ပံလှ၊ လောင်းရှည် အစရှိသည့် ကျေးရွာ ခြောက်ရွာက အိမ်ခြေ (၅၀၀)ကျော်ကိုလည်း မီးရှို့ဖျက်ဆီးခဲ့ကြတာ ဖြစ်ပါတယ်။

ခင်ဦးမြို့နယ်မှာ အကြမ်းဖက် စစ်ကောင်စီ အာဏာသိမ်းပြီးနောက်ပိုင်း မီးရှို့ဖျက်ဆီးခဲ့မှုကြောင့် ကျေးရွာပေါင်း(၆၆)ရွာက နေအိမ်ပေါင်း (၄,၀၀၀) ကျော် ပြာကျပျက်စီးခဲ့ပြီး စစ်ကောင်စီတပ်ရဲ့ သတ်ဖြတ်မှုကြောင့် ရဲဘော်နှင့် ဒေသခံပြည်သူ ၂၅၀ နီးပါး ကျဆုံးခဲ့ရပြီဖြစ်တယ်လို့သိရပါတယ်။