ကန့်ဘလူနယ်ရှိ စစ်ဘေးရှောင်ပြည်သူ(၂)ဦးကို ခမရ(၃၆၈)နဲ့ ပျူစောထီးအဖွဲ့က မီးရှို့သတ်ဖြတ်ခဲ့

◼ အသက်မပြည့်သေးတဲ့ ကလေးငယ်တဦးနဲ့ အမျိုးသမီးတဦးတို့ကို အကြမ်းဖက်စစ်တပ်က
လူသားဒိုင်းအဖြစ်ဖမ်းဆီးခေါ်ဆောင်

စစ်ကိုင်း၊ ကန့်ဘလူမြို့နယ် ထန်းကုန်းတိုက်နယ်က စစ်ဘေးရှောင် အမျိုးသားနှစ်ဦးကို အကြမ်းဖက်စစ်ကောင်စီတပ်ဖွဲ့နဲ့ ပျူစောထီး အဖွဲ့တွေက မီးရှို့သတ်ဖြတ်ခဲ့ကြတယ်လို့ ဖေဖေါ်ဝါရီ(၁၈) ရက်မှာ ကျွန်းလှ- ကန့်ဘလူ တက်ကြွလှုပ်ရှားသူများအဖွဲ့ရဲ့ သတင်းထုတ်ပြန်ချက်အရ သိရပါတယ်။

အကြမ်းဖက်စစ်ကောင်စီလက်အောက်ခံ ခြေမြန်တပ်ရင်း (၃၆၈) နဲ့ ပျူစောထီး အင်အား ၁၂၀ ခန့်ဟာ စစ်ကြောင်းထိုး ပစ်ခတ်ဝင်ရောက်လာပြီး ကိုင်းရိုးရွာအနီးရှိတောထဲ တဲတိုက်မှာ စစ်ရှောင်နေတဲ့ အသက် ၂၂နှစ် နဲ့ ၃၂ နှစ်အရွယ် အမျိုးသားနှစ်ဦးကို တွေ့ရှိပြီး သတ်ဖြတ်ခဲ့ကြတာ ဖြစ်တယ်လို့ ဖော်ပြထားပါတယ်။

အမျိုးသား (၂) ဦးကို သူတို့ရဲ့ဆိုင်ကယ်နှစ်စီးနဲ့အတူ အနီးမှာရှိတဲ့ ထွန်စက်ပေါ် တင်ပြီးရက်စက်စွာ မီးရှို့သတ်ဖြတ်ခဲ့ တာဖြစ်တယ်လို့ သတင်းထုတ်ပြန်ထားပါတယ်။

ဒါ့အပြင် အကြမ်းဖက်စစ်ကောင်စီတပ်ဟာ အင်းလယ်ကြီးရွာ က အသက်မပြည့်သေးတဲ့ (၁၅) နှစ်အရွယ် ကလေးတဦးနဲ့ အသက်၂၀ ကျော် အမျိုးသမီးတဦးကိုလည်း လူသားဒိုင်းအဖြစ်ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

အကြမ်းဖက်စစ်တပ် စစ်ကြောင်းထိုး ဝင်ရောက်လာလို့ အင်းလယ်ကြီး၊သရက်တာ၊အင်္ဂါထောင့်၊ ကိုင်းရိုး၊မဲသည်၊ပေလည်၊ ဆူးပုတ်ကုန်း၊ ညောင်ပင်ရွာမ၊ရွာသစ်၊ဉာဏ်အင်း၊ထိန်တော၊သပြေသာ၊ ဗိုလ်ကုန်း၊ရှမ်းတပ်၊မန်ကျီးကုန်း၊ဆူးတပ်၊ဆင်နင်း နဲ့ ဖုတ်ကုန်းရွာစတဲ့ ကျေးရွာပေါင်း (၁၈) ရွာက ပြည်သူ တသောင်းခွဲလောက် ဟာ စစ်ရှောင်နေရတယ်လို့ သိရပါတယ်။

ဒေသခံပြည်သူတွေရဲ့ စားနပ်ရိက္ခာအပါအဝင် စစ်ဘေးရှောင်တွေအတွက် အရေးပေါ် အကူအညီ တွေအများအပြား လိုအပ်နေကြောင်းကိုလည်း သတင်းထုတ်ပြန်ထားတယ်လို့သိရပါတယ်။