မုံရွာ လဝက ရုံး PDF လောင်ချာဖြင့် ပစ်ခတ်တိုက်ခိုက်ခံရပြီး စစ်ကောင်စီ(၃)ဦးသေဆုံး

◼ အကြမ်းဖက်စစ်ကောင်စီ တပ်သား (၃) ဦး သေဆုံး

မုံရွာမြို့ လူဝင်မှုကြီးကြပ်ရေးဦးစီးဌာန(လဝက) ရုံးကို ဖေဖေါ်ဝါရီ (၁၈)ရက် မနက် အစောပိုင်း ၃ နာရီအချိန်မှာ လောင်ချာနဲ့ သွားရောက်ပစ်ခတ်ခဲ့ရာမှာ အကြမ်းဖက်စစ်ကောင်စီတပ်သား (၃)ဦးသေဆုံးခဲ့တယ်လို့ မုံရွာပြည်သူ့ကာကွယ်ရေးတပ်ရင်း(၇)- Lightning People Defence Force အဖွဲ့ရဲ့ ဖေဖေါ်ဝါရီ (၁၈) ရက်မှာ သတင်း ထုတ်ပြန်ချက်အရသိရပါတယ်။

အဲဒီ လဝက ရုံးဟာ ပြည်သူလူထုကို ငွေညှစ်နှိပ်စက်နေတဲ့အတွက် သွားရောက်ပစ်ခတ်တိုက်ခိုက်ခဲ့တာဖြစ်တယ်လို့ မုံရွာပြည်သူ့ကာကွယ်ရေးတပ်ရင်း(၇)- Lightning People Defence Force အဖွဲ့ ရဲ့ သတင်းနှင့် ပြန်ကြားရေးက ပြောပါတယ်။

ဒါ့အပြင် ပြည်သူလူထုကို အနိုင်ကျင့်ဗိုလ်ကျနေတဲ့ အကြမ်းဖက် စစ်ကောင်စီ ထောက်တိုင်မှန်သမျှကို ဖြိုဖျက်သွားမှာ ဖြစ်တာကြောင့် ပြည်သူများ တတ်နိုင်တဲ့ ဘက်ကနေ ကူညီထောက်ပံ့ကြဖို့ Lightning People Defence Forceက မေတ္တာရပ်ခံထားပါတယ်။

အဲဒီ လဝကရုံးကို ပစ်ခတ်တိုက်ခိုက်ခဲ့တာဆိုရင် ပြီးခဲ့တဲ့ ဖေဖေါ်ဝါရီ (၁၃) ရက်ကလည်း အဲဒီလဝကရုံးကနေ စစ်ဆေးဖို့ ထွက်လာတဲ့ အကြမ်းဖက် စစ်ကောင်စီတပ်ဖွဲ့ဝင် ငါးဦးကို အလစ်ဝင်ရောက်တိုက်ခိုက်ခဲ့တာကြောင့် ထိခိုက်သေဆုံးမှုရှိခဲ့သေးတယ်လို့ Chindwin Attack Force ရဲ့ထုတ်ပြန်ချက်အရ သိရပါတယ်။