Myanmar
Englishအမျိုးသားညီညွတ်ရေးအစိုးရ၊ ပညာရေးဝန်ကြီးဌာနက ကျင်းပပြုလုပ်မယ့် တက္ကသိုလ်ဝင်တန်းစာမေးပွဲမှာ စစ်ဒေသခွဲအမှတ် (၃) အတွင်းမှာရှိတဲ့ ဒေသခံပြည်သူတွေနဲ့ ပြည်သူ့ကာကွယ်ရေးတပ်မတော် က ရဲဘော်၊ ရဲမေ တွေပါ ပါဝင်ဖြေဆိုသွားကြမှာ ဖြစ်တယ်လို့ စစ်ဒေသခွဲ အမှတ် (၃) ၊ သတင်းနှင့် ပြန်ကြားရေးဌာနရဲ့ ထုတ်ပြန်ချက်အရ သိရပါတယ်။
တာဝန်အသီးအသီးထမ်းဆောင်နေကြတဲ့ ပြည်သူ့ကာကွယ်ရေးတပ်မတော် ရဲဘော်၊ ရဲမေတွေအတွက်လည်း အချိန်ပိုများယူကာ လေ့ကျင့်သင်ကြားပေးလျက်ရှိတယ်လို့ စစ်ဒေသခွဲ အမှတ် ၃ ၊ သတင်းနှင့် ပြန်ကြားရေးဌာနက ထုတ်ပြန်ထားပါတယ်။
အကြမ်းဖက်စစ်ကောင်စီရဲ့ စစ်ကျွန်ပညာရေးစနစ်ကို ဆန့်ကျင်ပြီး CDM လှုပ်ရှားမှုမှာ ပါဝင်ခဲ့တဲ့ ဆရာ၊ ဆရာမများနဲ့ တက္ကသိုလ် ကျောင်းသား၊ ကျောင်းသူတွေကလည်း စာမေးပွဲဖြေဆိုရန် ပြင်ဆင်နေတဲ့ ဒေသခံပြည်သူများနဲ့ ရဲဘော်၊ ရဲမေတွေကို တပတ် (၇) ရက်နဲ့ တနေ့ ၂ နာရီအချိန်ယူ စာသင်ကြားပေးခဲ့ကြတာဖြစ်ပါတယ်။
တက္ကသိုလ်ဝင်တန်းစာမေးပွဲ ဖြေဆိုကြမယ့် ပြည်သူ့ကာကွယ်ရေး ရဲဘော်တွေ အနေနဲ့လည်း အခုလို တာဝန်တွေထမ်းဆောင်နေချိန်မှာလည်း ပညာရေးသင်ယူခွင့် မဆုံးရှုံးအောင်ဆောင်ရွက်ပေးတဲ့အတွက် NUG အစိုးရကို ကျေးဇူးတင်တယ်လို့ ပြောပါတယ်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ရဲဘော်တွေရဲ့ တော်လှန်ရေးကာလအတွင်း ပညာသင်ယူခွင့်အခွင့်အလမ်းနဲ့ ပညာသင်ယူရာမှာ No Discrimination – ခွဲခြားဆက်ဆံခံရမှု မရှိစေရန်အတွက် ပြည်သူ့ကာကွယ်ရေးတပ်မတော် စစ်ကြောင်းများအတွင်းရှိ ရဲဘော်တွေကို ဂရုတစိုက်စောင့်ကြည့်လျက်ရှိတယ်လို့သိရပါတယ်။
လူငယ်များရဲ့ ရသင့်ရထိုက်တဲ့ အခွင့်အရေးတွေကို တော်လှန်ရေးကာလအတွင်း မဆုံးရှုံးစေရန်အတွက် တာဝန်ယူဆောင်ရွက်လျက်ရှိတယ်လို့ စစ်ဒေသခွဲ အမှတ် (၃) က အသိပေးဖော်ပြထားတယ်လို့သိရပါတယ်။
