တောင်တွင်း-မင်းကင်း ပြည်သူ့ကာကွယ်ရေးတပ် ဆက်လက်ရပ်တည်နိုင်ရန် အကူအညီလိုအပ်လျက်ရှိ

စစ်ကိုင်း၊ တောင်တွင်း-မင်းကင်း ပြည်သူ့ကာကွယ်ရေးတပ်ဖွဲ့ဟာ တော်လှန်ရေး အချိန်ကြာလာတာနဲ့အမျှ ရပ်တည်ဖို့ ခက်ခဲလာတာကြောင့် ပြည်သူတွေဆီက အကူအညီတောင်းခံနေရတယ်လို့ သိရပါတယ်။

People Defence Force Taung Dwin-Minkin TDPDF အနေနဲ့ တပ်ရင်းတပ်ဖွဲ့တည်ထောင်ပြီး အကြမ်းဖက်
စစ်အာဏာရှင်ကို တစိုက်မတ်မတ် တော်လှန်ရေးလုပ်လာခဲ့တာ (၂)နှစ် နီးပါး ရှိနေပြီ ဖြစ်တယ်လို့ဆိုပါတယ်။

အဲဒီကာလအတွင်းမှာ မင်းကင်းမြို့နယ် တောင်တွင်းဒေသက အကြမ်းဖက်စစ်အာဏာရှင်ကိုတော်လှန်ရင်း အသက်ပေးခဲ့ရတဲ့ PDF ရဲဘော်(၂၀) ကျော်အထိ ရှိခဲ့ပြီလို့ People Defence Force Taung Dwin-Minkin TDPDF က ပြောကြားထားတာပါ။

အင်တာနက်လိုင်း ဖုန်းလိုင်းဖြတ်တောက်ခံရတာကြောင့် မင်းကင်းနယ် အတွင်းက တော်လှန်ရေးတပ်ဖွဲ့တွေရဲ့ တိုက်ပွဲသတင်းတွေ နဲ့ လက်နက်ခဲယမ်းလိုအပ်ချက်တွေ ၊ ရိက္ခာခက်ခဲမှုတွေနဲ့ ကြုံတွေ့နေရတာတွေကို ပြည်သူတွေ မသိမြင်ကြဘူးလို့ ဆိုပါတယ်။

အကြမ်းဖက်စစ်တပ်ကို အမြစ်ဖြိုနိုင်ဖို့ လိုအပ်တဲ့ လက်နက်ခဲယမ်းတွေ ဖြည့်တင်းနိုင်ဖို့နဲ့ ရိက္ခာလိုအပ်ချက်ကို ဖြည့်တင်းနိုင်ဖို့ အားလုံးပူးပေါင်းပါဝင်ပေးကြဖို့ တောင်တွင်း-မင်းကင်း ပြည်သူ့ကာကွယ်ရေးတပ်က ထပ်မံတောင်းဆိုထားတယ်လို့သိရပါတယ်။