အကြမ်းဖက် စစ်ကောင်စီ KNU တပ်မဟာ (၅) နယ်မြေကို လေကြောင်းမှ ဗုံးကြဲ

စစ်ကောင်စီတိုက်လေယာဉ်က ဗုံးသီး(၁၂)လုံး လယ်မြေအတွင်း ကြဲချ

KNUတပ်မဟာ(၅)နယ်မြေ ဖာပွန်ခရိုင်ရှိ ကျေးရွာတွေ ကို အကြမ်းဖက် စစ်ကောင်စီတပ်က လေကြောင်းမှ ဗုံးကြဲခြင်း လက်နက်ကြီးဖြင့် ပစ်ခတ်တိုက်ခိုက်ခြင်းတို့ လုပ်ဆောင်ခဲ့တယ်လို့ KNU တပ်မဟာ (၅) က သတင်းထုတ်ပြန်ထားပါတယ်။

ဒီဇင်ဘာ (၆) ရက် က စစ်ကောင်စီတပ်စခန်း သုံးခုထက်မနည်းကို စခန်းသိမ်းတိုက်ပွဲအနေဖြင့်တိုက်ခိုက်နိုင်ခဲ့ပြီး စခန်းအချို့ကို သိမ်းဆည်းနိုင်ခဲ့ပါတယ်။

အဲဒီလိုတိုက်ခိုက်ခံရပြီးနောက် ဒီနေ့ ဒီဇင်ဘာ (၇) ရက်မနက်ပိုင်းမှာ စစ်အုပ်စုဘက်က တိုက်လေယာဉ် (၂)စီးနဲ့ ဒေဘုနိုကျေးရွာအတွင်းကို ဗုံးသီးကြဲချခြင်း ၊ အခြားကျေးရွာတွေကို အမြောက်လက်နက်ကြီးနဲ့ ရမ်းသမ်းပစ်ခတ်ခြင်းတွေ လုပ်ဆောင်ခဲ့တယ်လို့သိရပါတယ်။

ယနေ့ ဒီဇင်ဘာ (၇) ရက် မနက် ၄နာရီခွဲအချိန်မှာ အကြမ်းဖက် စစ်ကောင်စီရဲ့ တိုက်လေယာဉ် တစီးဟာဖာပွန် (မူတြော်) ခရိုင်လူသောမြို့နယ်၊ ပေးကေးကျေးရွာအုပ်စုအတွင်းရှိ ဒေဘုနိုကျေးရွာအတွင်းကို ဗုံးသီး နှစ်လုံး လာရောက်ကြဲချခဲ့တဲ့အတွက် ရောဘာ်ပင်များကိုပါ ထိခိုက်ပျက်စီးခဲ့ရတယ်လို့ ထုတ်ပြန်ထားတာပါ။

အဲဒီ တချိန်တည်း မှာပဲ ဘူးသိုမြို့နယ်၊ ခေါပု(ခေါပုတ်)ကျေးရွာအုပ်စုအတွင်းရှိ ဖောထာကျေးရွာ အနီးအနားလယ်မြေအတွင်းကို အကြမ်းဖက် စစ်ကောင်စီတိုက်လေယာဉ်က ဗုံးသီး(၁၂)လုံးလာရောက်ကြဲချ ခဲ့တဲ့အတွက် ဒေသခံ ပြည်သူပိုင် ကျွဲ(၆)ကောင် ပြင်းထန်စွာ ဒဏ်ရာရခဲ့တယ်လို့ သိရပါတယ်။

နံနက် ၁၀နာရီခန့်တွင် ဖာပွန်မြို့အခြေစိုက်တပ်စခန်းမှ မူတြော်ခရိုင်၊ ဘူးသိုမြို့နယ်၊ ပါဟိုက်ကျေးရွာအုပ်စုအတွင်းရှိ ဘောခေါ်ဒဲကျေးရွာအတွင်းကို လက်နက်ကြီးဖြင့် ပစ်ခတ်ခဲ့ကြောင်း၊ ၁၀နာရီ ကျော်တွင်လည်း ထိုဝီးဒဲကျေးရွာနားရှိတောစပ်တစ်နေရာသို့ လက်နက်ကြီးဖြင့် ပစ်ခတ်ခဲ့ပြန်ပါတယ်။

ဖာပွန်ခရိုင်အတွင်းရှိ စစ်ကောင်စီတပ်ကို KNU တပ်မဟာ(၅)က ပြောက်ကျားတိုက်ခိုက်မှုများ ဆက်တိုက်လုပ်ဆောင်လျက်ရှိရာ နိုဝင်ဘာလအတွင်း တိုက်ပွဲ ၁၁၀ ကျော်ဖြစ်ခဲ့တယ်လို့ ထုတ်ပြန်ထားပါတယ်။

ယခုလ ဒီဇင်ဘာ( ၆)ရက်မှစ၍ စစ်ကောင်စီတပ်စခန်းအချို့ကို KNUက သိမ်းပိုက်ရန် ကြိုးပမ်းခဲ့ရာ ယမန်နေ့က ညာတခိုကျိုး စခန်းသိမ်းတိုက်ပွဲမှာ အကြမ်းဖက် စစ်ကောင်စီတပ်မှ သေဆုံးထိခိုက်မှုများ ရှိခဲ့ပြီး လက်နက်ခဲယမ်းများ သိမ်းဆည်းရရှိခဲ့တယ်လို့သိရပါတယ်။